தமிழகத்தில் சட்டமன்றத் தேர்தல் சூடு பிடித்துள்ள நிலையில், உயர்மட்ட அதிகாரிகள் மாற்றம் அரசியல் களத்தில் கடும் பரபரப்பை ஏற்படுத்தியுள்ளது. அதிமுக பொதுச்செயலாளர் எடப்பாடி பழனிசாமி அனுப்பிய பட்டியல், தேர்தல் ஆணையத்தின் நடவடிக்கை, அதற்கு திமுக கொடுத்த கடும் எதிர்ப்பு என சூழல் மேலும் தீவிரமடைந்துள்ளது.
தேர்தல் நியாயமாக நடைபெற வேண்டும் என்ற காரணத்தால், முக்கிய அதிகாரிகளை மாற்ற வேண்டும் என எடப்பாடி பழனிசாமி தேர்தல் ஆணையத்துக்கு கோரிக்கை வைத்திருந்தார். சென்னை போலீஸ் கமிஷனர் அருணை மாற்ற வேண்டும் என்பது அவரது முக்கிய கோரிக்கையாக இருந்தது. அந்த மாற்றம் நடந்தாலும், அவர் பரிந்துரைத்த அதிகாரி பதவியேற்கவில்லை; அதற்கு பதிலாக அபின் தினேஷ் மோடக் நியமிக்கப்பட்டார்.
அதேபோல் தலைமைச் செயலாளர் மாற்றம் உள்ளிட்ட நிர்வாக மாற்றங்களும் நடந்தன. ஆனால், எடப்பாடி விரும்பிய அதிகாரிகள் பதவிக்கு வராதது கவனிக்கத்தக்கதாக அமைந்தது.
இந்த மாற்றங்களில் முக்கிய திருப்பமாக அமைந்தது லஞ்ச ஒழிப்புத் துறை டிஜிபி நியமனம். டேவிட்சன் தேவாசீர்வாதம் மாற்றப்பட்டு, சந்தீப் மிட்டல் நியமிக்கப்பட்டதும், திமுக கடும் எதிர்ப்பை பதிவு செய்தது.
திமுக பொருளாளர் டி.ஆர். பாலு, தேர்தல் ஆணையத்துக்கு எழுதிய கடிதத்தில், சந்தீப் மிட்டல் மீது கடுமையான குற்றச்சாட்டுகளை முன்வைத்து, அவர் பதவியில் இருந்தால் தேர்தல் நடுநிலைமை பாதிக்கப்படும் என எச்சரித்தார். மேலும், இந்த நியமனத்தை திரும்ப பெறாவிட்டால் நீதிமன்றத்தை நாடுவோம் எனவும் திமுக எச்சரிக்கை விடுத்தது.
இதன் பின்னர் தேர்தல் ஆணையம் உடனடியாக நடவடிக்கை எடுத்து, ஒரே நாளில் சந்தீப் மிட்டலை பதவியிலிருந்து நீக்கி, மீண்டும் டேவிட்சன் தேவாசீர்வாதத்தை அதே பொறுப்பில் தொடரச் செய்தது.
மொத்தத்தில், அதிகாரிகள் மாற்றம் என்ற எடப்பாடியின் கோரிக்கை நிறைவேற்றப்பட்டாலும், அவர் விரும்பிய அதிகாரிகள் பதவிக்கு வராதது மற்றும் திமுக அழுத்தத்தில் தேர்தல் ஆணையம் முடிவை மாற்றியமைத்தது ஆகியவை அரசியல் ரீதியாக முக்கிய செய்தியாக மாறியுள்ளது.
இதனால், “மாற்றம் நடந்தது சரி… ஆனால் கட்டுப்பாடு யாரிடம்?” என்ற கேள்வி தமிழக அரசியல் வட்டாரத்தில் தீவிரமாக பேசப்படுகிறது.
