Iran War Live Update: अमेरिका आजपासून होर्मुझच्या सामुद्रधुनीवर नाकेबंदी लागू करत आहे. अमेरिकेच्या सेंट्रल कमांडनुसार, इराणच्या बंदरांवर ये-जा करणारी जहाजे भारतीय प्रमाणवेळेनुसार संध्याकाळी 7.30 वाजल्यापासून रोखली जातील. राष्ट्राध्यक्ष डोनाल्ड ट्रम्प यांनी सांगितले की, इराणला तेल विक्री करण्यापासून रोखणे हा या नाकेबंदीचा उद्देश आहे. ट्रम्प यांच्या मते, इतर अनेक देशही या प्रयत्नात अमेरिकेला पाठिंबा देत आहेत. ट्रम्प यांनी दावा केला की, इराणच्या लष्कराचे मोठे नुकसान झाले आहे आणि त्यांचे नौदल अक्षरशः नष्ट झाले आहे. त्यांनी सांगितले की 158 जहाजे नष्ट झाली आहेत.

सर्व पर्याय खुले आहेत 

नाकेबंदी जाहीर झाल्यापासून जागतिक तेलाच्या किमती वाढल्या आहेत. वेस्ट टेक्सास इंटरमीडिएट प्रति बॅरल 104 डॉलरवर पोहोचले आहे, आणि ब्रेंट क्रूडने प्रति बॅरल 102 डॉलरचा टप्पा ओलांडला आहे. दरम्यान, वॉल स्ट्रीट जर्नलच्या एका अहवालानुसार, पाकिस्तानमधील चर्चा अयशस्वी झाल्यानंतर अमेरिका इराणवर दुसऱ्या लष्करी हल्ल्याचा विचार करत आहे. व्हाईट हाऊसने स्पष्ट केले आहे की सर्व पर्याय खुले आहेत आणि पुढील निर्णय परिस्थितीनुसार घेतले जातील.

होर्मुझच्या सामुद्रधुनीतून जलवाहतूक थांबली 

होर्मुझच्या सामुद्रधुनीतून होणारी जलवाहतूक जवळजवळ थांबली आहे. अमेरिकेने होर्मुझच्या सामुद्रधुनीवर घातलेल्या नाकेबंदीचा परिणाम तात्काळ जाणवला आहे. या सागरी मार्गावरील जलवाहतूक जवळजवळ थांबली आहे. सागरी गुप्तचर संस्था 'लॉइड्स लिस्ट'च्या मते, नाकेबंदी जाहीर होताच वाहतूक तात्काळ थांबली आणि अनेक जहाजांनी आपला मार्ग बदलला किंवा माघारी फिरले.

गेल्या 24 तासांतील 5 प्रमुख घडामोडी

• ट्रम्प यांनी चीनला स्पष्ट इशारा दिला आहे की, जर चीनने इराणला लष्करी मदत पुरवली, तर अमेरिका 50 टक्क्यांपर्यंत  शुल्क लादेल.
• ट्रम्प यांनी सांगितले की, अमेरिकेचे नौदल होर्मुझच्या सामुद्रधुनीची नाकेबंदी करेल आणि इराणला टोल देणारी जहाजे मार्गातच थांबवली जातील.
• जॉर्डनने इस्रायली मंत्री बेन ग्विर यांच्या अल-अक्सा मशीद भेटीचा निषेध केला असून, या कृतीमुळे धार्मिक भावना दुखावल्या जात असल्याचे म्हटले आहे.
• इराणने दावा केला आहे की होर्मुझची सामुद्रधुनी पूर्णपणे त्यांच्या नियंत्रणाखाली आहे आणि त्यातून जाणाऱ्या जहाजांना रियालमध्ये टोल भरावा लागेल.
• अमेरिका आणि इस्रायलला संवेदनशील माहिती पुरवल्याच्या आरोपाखाली इराणमध्ये जवळपास 50 जणांना अटक करण्यात आली आहे.

इस्रायलकडून दक्षिण लेबनॉनवर हवाई हल्ले

दरम्यान, इस्रायलने पुन्हा एकदा दक्षिण लेबनॉनवर हवाई हल्ले केले आहेत. अल जझीराच्या वृत्तानुसार, नबातीये शहर आणि मैफादौन गावाला लक्ष्य करण्यात आले. नुकसानीबद्दल किंवा जीवितहानीबद्दल सध्या कोणतीही माहिती उपलब्ध नाही.

अमेरिका इराणवर पुन्हा हल्ला करू शकते?

इराणसोबतच्या वाटाघाटी अयशस्वी झाल्यानंतर, अमेरिका पुन्हा एकदा इराणविरुद्ध लष्करी कारवाई करू शकते. वॉल स्ट्रीट जर्नलच्या वृत्तानुसार, राष्ट्राध्यक्ष ट्रम्प इराणवर आणखी एक हवाई हल्ला करण्याच्या पर्यायाचा विचार करत आहेत. अमेरिकेने होर्मुझच्या सामुद्रधुनीवर आधीच सागरी नाकेबंदी जाहीर केली आहे आणि आता इतर लष्करी पर्यायांचा विचार करत आहे.

पोप लिओ यांच्यावरही ट्रम्प घसरले

ट्रम्प यांनी कॅथोलिक ख्रिश्चन धर्मगुरू पोप लिओ यांच्यावर परराष्ट्र धोरणासाठी वाईट असल्याचा आरोप केला आहे. सोशल मीडियावरील एका पोस्टमध्ये ट्रम्प यांनी म्हटले आहे की, परराष्ट्र धोरणाबाबत पोप यांची भूमिका योग्य नाही. गेल्या आठवड्यात, पोप लिओ यांनी इराणबाबत ट्रम्प यांच्या धमक्या आणि वक्तव्यांवर टीका केली होती. ट्रम्प यांनी म्हटले होते की, इराणच्या अणुशस्त्रांबाबत सौम्य भूमिका घेणारे पोप त्यांना नको आहेत.

इतर महत्वाच्या बातम्या

• Iran War Live Update: आता चेंडू अमेरिकेच्या कोर्टात! अमेरिकेसोबत फेस टू फेस तब्बल 21 तासांच्या चर्चेत नेमकं काय घडलं? याची देही याचि डोळा साक्षीदार असणाऱ्या अन् टीम लीड करणाऱ्या इराणी संसद अध्यक्षांच पहिलं निवेदन