Dhurandhar 2 Box Office Day 25: दिग्दर्शक आदित्य धर यांनी पुन्हा एकदा सिद्ध केले आहे की जिद्द आणि मेहनतीच्या जोरावर मोठं यश मिळवता येतं. रणवीर सिंग, संजय दत्त आणि अर्जुन रामपाल यांच्या प्रमुख भूमिका असलेला धुरंधर 2 हा चित्रपट प्रदर्शित होऊन 25 दिवस उलटले असले तरी बॉक्स ऑफिसवर त्याची कमाई अद्याप जोरात सुरू आहे.

रविवारी मिळालेल्या सुट्टीचा चित्रपटाला मोठा फायदा होताना दिसत आहे. सकाळी 10 वाजेपर्यंतच या चित्रपटाने सुमारे 1.13 कोटी रुपयांची कमाई केली असून देशभरात सुमारे 2077 शो दाखवले जात आहेत. गेल्या दिवसाच्या तुलनेत कमाईत जवळपास 18 टक्क्यांची वाढ नोंदवली गेली आहे.

24 व्या दिवशी या चित्रपटाने सुमारे 13.50 कोटी रुपयांचा गल्ला जमवला होता. ज्यामध्ये 24.3 टक्क्यांची वाढ झाल्याचे दिसून आले. या जोरावर ‘धुरंधर 2’ चित्रपटाचे एकूण भारतीय नेट कलेक्शन तब्बल 1070.05 कोटी रुपयांपर्यंत पोहोचल्याचे सांगितले जात आहे.

वीकेंडचा मोठा फायदा

गेल्या आठवड्यात या चित्रपटाची गती थोडी मंदावली होती, मात्र वीकेंड सुरू होताच पुन्हा एकदा चित्रपटाने बॉक्स ऑफिसवर जोरदार पुनरागमन केले आहे. प्रेक्षकांकडून मिळणारा प्रतिसाद आणि वाढती गर्दी यामुळे चित्रपटाची कमाई सातत्याने वाढताना दिसत आहे.

दरम्यान, सोशल मीडियावर असा दावा केला जात आहे की, पाकिस्तानमध्ये या चित्रपटावरील बंदी उठवण्याचा विचार सुरू आहे. स्थानिक प्रेक्षक चोरीछुप्या मार्गाने चित्रपट पाहत असल्याने सरकार या चित्रपटाच्या प्रदर्शनातून महसूल मिळवण्याच्या तयारीत असल्याची चर्चा आहे.

अगदी चित्रपटाच्या तिकिटांवर 60 टक्के कर लावण्याचाही विचार होत असल्याचे बोलले जात आहे. मात्र याबाबत अद्याप कोणतीही अधिकृत घोषणा करण्यात आलेली नाही.

‘धुरंधर 2’ हा चित्रपट केवळ भारतातच नाही तर आंतरराष्ट्रीय स्तरावरही चर्चेत आहे. दमदार स्टारकास्ट, अॅक्शन आणि कथानकामुळे प्रेक्षकांना आकर्षित करण्यात हा चित्रपट यशस्वी ठरला आहे. वीकेंडच्या जोरावर त्याची कमाई आणखी वाढण्याची शक्यता व्यक्त केली जात आहे. चित्रपट पाहण्यासाठी देखील चाहते मोठ्या प्रमाणात गर्दी करताना दिसत आहेत.