राजस्थान रॉयल्स आणि रॉयल चॅलेंजर्स बंगळुरू यांच्यात सामना पार पडला. या सामन्यात राजस्थान रॉयल्सने आरसीबीला पराभवाची धूळ चारली होती. पण या सामन्याची चर्चा अजूनही रंगली आहे. त्याला कारण म्हणजे लाईव्ह सामन्यात राजस्थान रॉयल्सचा मॅनेजर रोमी भिंडर मोबाईल फोन वापरताना दिसला होता. त्यानंतर क्रीडावर्तुळात या वर्तनाबाबत जोरदार चर्चा रंगली होती. इतकंत काय तर सोशल मीडियावरही वाभाडे काढण्यात आले होते. त्यानंतर बीसीसीआयने या प्रकरणाची तपासणी सुरू केली होती. आता ही तपासणी पूर्ण झाली असून यात रोमी भिंडरला आर्थिक दंड ठोठावण्यात आला आहे. तसेच अशी कृती पुन्हा होणार नाही, याची हमी घेतली आहे. तर त्याच्या बाजूला बसलेला 15 वर्षीय वैभव सूर्यवंशीला या प्रकरणातून सुटला आहे. त्याच्यावर कोणतीही कारवाई केली जाणार नाही.

आयपीएल 2026 स्पर्धेत 10 एप्रिलला राजस्थान रॉयल्स आणि रॉयल चॅलेंजर्स बंगळुरू यांच्यात गुवाहाटीत सामना पार पडला होता. राजस्थान रॉयल्स फलंदाजी करत असताना रोमी भिंडर मोबाईलवर काही तरी करताना दिसला. डगआऊट जवळ बसून तो हे काम करत होता. खरं तर मॅनेजरला ड्रेसिंग रूममध्ये मोबाईल घेऊन जाण्याची परवानगी असते. पण डगआऊटमध्ये असं करणं सक्त मनाई आहे. त्यामुळे रोमी भिंडरविरुद्ध कारवाई करण्यात आली. रोमी भिंडरला दंड भरावा लागला असला तरी अँटी करप्शन युनिटने त्याला भ्रष्टाचार प्रकरणात क्लीन चिट दिली आहे.

रोमी भिंडर मोबाईल का घेऊन आला होता?

रोमी भिंडर डगआऊट जवळ मोबाईल वापरण्यासाठी बीसीसीआयची परवानगी घेतल्याचं समोर आलं आहे. आरोग्याच्या कारणास्तव त्यांना ही सूट मिळाली होती. आयपीएल स्पर्धेपूर्वी भिंडर आजारी होते आणि फुफ्फुसाच्या आजाराशी झुंज देत होते. त्यांनी बराच काळ आयसीयूत घालवला होता. आरोग्याच्या कारणास्तव त्यांना डॉक्टरांचा मोबाईलवर सल्ला घ्यावा लागतो. असं असलं तरी डगआऊटजवळ मोबाईल वापरल्याने नियमाचं उल्लंघन मानलं गेलं आहे. त्यामुळेच त्यांच्यावर कारवाईचा बडगा उचलला गेला आहे.