चेन्नई सुपर किंग्सचा अनुभवी फलंदाज आणि माजी कर्णधार महेंद्रसिंह धोनी (Mahendra Singh Dhoni) आयपीएल स्पर्धेच्या 19 व्या मोसमात (IPL 2026) एन्ट्री करणार असल्याचं म्हटलं जात आहे. धोनीच्या एन्ट्रीची घोषणा येत्या काही दिवसांत होणं अपेक्षित आहे. धोनीला दुखापतीमुळे आयपीएल 2026 स्पर्धेत आतापर्यंत एकही सामना खेळता आलेला नाही. त्यामुळे चाहत्यांना धोनी कधी परतणार? याची प्रतिक्षा होती. मात्र चाहत्यांची धोनीबाबतची ही प्रतिक्षा लवकरच संपेल, असं चित्र आहे. तर दुसऱ्या बाजूला मुंबई इंडियन्सचा अनुभवी फलंदाज आणि माजी कर्णधार रोहित शर्मा याला दुखापतीमुळे एका सामन्याला मुकावं लागलंय. त्यामुळे रोहितला आणखी किती सामन्यांतून बाहेर रहावं लागेल? असा प्रश्न या निमित्ताने क्रिकेट चाहत्यांकडून उपस्थित केला जात आहे. रोहितच्या दुखापतीबाबत मुंबईचे हेड कोच महेला जयवर्धने यांनी माहिती दिलीय.
रोहितला रॉयल चॅलेंजर्स बंगळुरु विरूद्धच्या सामन्यादरम्यान बॅटिंग करताना दुखापत झाली होती. रोहितला या दुखापतीमुळे रिटायर्ड हर्ट होऊन मैदानाबाहेर जावं लागलं होतं. रोहितला या दुखापतीमुळे गुरुवारी 16 एप्रिलला पंजाब किंग्स विरूद्धच्या सामन्यातून बाहेर रहावं लागलं होतं. हार्दिकने पंजाब विरुद्ध टॉसनंतर रोहितला आणखी काही सामन्यांना मुकावं लागू शकतं, असं सांगितलं होतं. आता हेड कोचने रोहितच्या दुखापतीबाबत ताजी अपडेट दिली आहे.
“रोहितने धावायला सुरुवात केली आहे. रोहितला कसं वाटतंय याकडे आम्ही दररोज लक्ष देत आहोत. रोहितला त्याला कसं वाटतंय हे इतरांपेक्षा जास्त माहितीय. त्यामुळे रोहितची दुखापत ही गंभीर बाब नाही. तसेच आम्हाला त्याच्यावर कोणत्याही प्रकारे दबाव टाकायचा नाहीय, कारण ही या पर्वाची सुरुवात आहे”, असं जयवर्धनने सांगितलं.
मुंबईने या मोसमात आतापर्यंत 5 सामने खेळले आहेत. रोहितने त्यापैकी 4 सामने खेळले आहेत. रोहितने कोलकाता विरुद्ध घरच्या मैदानात अर्थात वानखेडे स्टेडियममध्ये 78 रन्सची चाबूक खेळी करुन जबरदस्त सुरुवात केली होती. मात्र रोहित त्यानंतर सातत्य कायम ठेवण्यात अपयशी ठरला. मीडिया रिपोर्ट्सनुसार, रोहित 23 एप्रिलला होणाऱ्या सामन्यातून कमबॅक करु शकतो. मुंबईसमोर 23 एप्रिलला चेन्नई सुपर किंग्सचं आव्हान असणार आहे. त्यामुळे आता रोहित सीएसके विरुद्ध कमबॅक करणार की चाहत्यांना आणखी वाट पाहावी लागणार? हे येत्या काही दिवसांतच स्पष्ट होईल.
