Why Akash Madhwal joined Chennai Super Kings squad Hyderabad? चेन्नई सुपर किंग्सची गाडी रूळावर आलेली असताना त्यांचा प्रमुख गोलंदाज खलील अहमद ( Khaleel Ahmed Injury) याने इंडियन प्रीमिअर लीग २०२६ मधून माघार घेतली. CSK चा वेगवान गोलंदाज नॅथन एलिस यापूर्वीच दुखापतीमुळे स्पर्धेतून बाहेर झाला आहे. महेंद्रसिंग धोनीही अद्याप दुखापतीमुळे खेळलेला नाही. आता खलीलही स्पर्धेतून बाहेर झाल्याने हा CSK साठी मोठा धक्का मानला जात आहे. पण, चेन्नईच्या पुढच्या सामन्यापूर्वी मोठा ट्विस्ट पाहायला मिळतोय.. काल मुंबई इंडियन्ससोबत असलेला नेट बॉलर आज चेन्नईच्या ताफ्यात दिसला. वानखेडे स्टेडियमवर सराव सत्रात तो रोहित शर्माचे पाय पडताना दिसला होता.

खलील अहमदला १४ एप्रिलला कोलकाता नाईट रायडर्सविरुद्ध खेळताना मांडीला दुखापत झाली होती. त्यामुळे त्याला पूर्ण ४ षटकेही टाकता आली नव्हती. तो मैदानातून गोलंदाजीदरम्यानच बाहेर गेला होता. आता त्याला उर्वरित स्पर्धेला मुकावे लागणार आहे, दुखापतीतून बाहेर येण्यासाठी त्याला १० ते १२ आठवड्यांचा कालावधी लागण्याची शक्यता आहे.

CSK चा पुढील सामना शनिवारी हैदराबादच्या राजीव गांधी स्टेडियमवर सनरायझर्स हैदराबादविरुद्ध होणार आहे. या सामन्यापूर्वी मुंबई इंडियन्सचा नेट बॉलर आकाश मधवाल ( Akash Madhwal ) हा CSK च्या जर्सीत हैदराबाद येथे दिसला. त्यामुळे तो आता खलील अहमदच्या जागी चेन्नईकडून खेळणार असल्याच्या चर्चेचा सुरुवात झाली आहे. संघाच्या सीईओने सांगितले की, दुखापतग्रस्त खलील अहमदच्या बदली खेळाडूचा निर्णय घेण्यापूर्वी मधवाल आणि इतर काही गोलंदाजांना संधी दिली जाईल.