मध्य-पूर्वेत आता पुन्हा एकदा तणाव वाढण्याची शक्यता आहे. इराणने शनिवारी पुन्हा एकदा होर्मुज सामुद्रधुनी बंद करण्याची घोषणा केली आहे. आता ही घोषणा होताच इराणने होर्मुजमधून जात असलेल्या एका टँकरवर हल्ला करत गोळीबार केला. ब्रिटिश लष्कराने सांगितले की इराणच्या रिव्होल्यूशनरी गार्डच्या दोन गनबोटी होर्मुजमधून जाणाऱ्या एका टँकरवर गोळीबार करत होत्या. यामुळे आता मध्य पूर्वेसह जगात पुन्हा एकदा तणाव वाढला आहे. यामुळे डोनाल्ड ट्रम्प यांना पुन्हा एकदा मोठा धक्का बसला आहे.
इराणकडून जहाजांवर झालेल्या हल्ल्यांनंतर युनायटेड किंगडम मॅरिटाइम ट्रेड ऑपरेशन्स सेंटरने सांगितले की, टँकर आणि त्यावरील कर्मचारी सुरक्षित आहेत. मात्र ब्रिटनने या जहाजाची ओळख किंवा ते कुठे जात होते याची माहिती सार्वजनिक केलेली नाही. यापूर्वी इराणने जाहीर केले होते की, अमेरिकेने इराणी जहाजवाहतूक आणि बंदरांवर लादलेल्या निर्बंधांच्या प्रत्युत्तरात या सामुद्रधुनीवर पुन्हा निर्बंध लागू करत आहे. गेल्या सात आठवड्यांपासून सुरू असलेल्या या युद्धाच्या काळात इराणने या मार्गातून प्रवास करणाऱ्या जहाजांना रोखत आहे. मात्र परवानगी असलेल्या जहाजांना होर्मुझ पार करताना कोणतीही अडचण येच नाहीये.
हल्ला झालेल्या जहाजाच्या कॅप्टनने सांगितले की, ओमानपासून सुमारे 37 किलोमीटर (23 मैल) ईशान्येस इराणच्या रिव्होल्यूशनरी गार्ड्स कॉर्प्स (IRGC) च्या दोन गनबोटी त्यांच्या टँकरजवळ आल्या आणि कोणतीही चेतावणी न देता गनबोटीने टँकरवर गोळीबार सुरू केला. याआधी इराणने होर्मुज पुन्हा उघडण्याचा निर्णय मागे घेत या महत्त्वाच्या जलमार्गावर पुन्हा निर्बंध लागू केले होते. कारण अमेरिकेचे राष्ट्राध्यक्ष डोनाल्ड ट्रम्प यांनी नाकेबंदीची घोषणा केल्यानंतर इराणने हा निर्णय घेतला होता.
इराणच्या लष्करी कमांडने एका निवेदनात म्हटले की, अमेरिकेने इराणच्या बंदरांकडे येणाऱ्या-जाणाऱ्या जहाजांवरील नाकेबंदी कायम ठेवून दिलेला शब्द तोडला आहे. जोपर्यंत अमेरिका इराणकडे येणाऱ्या सर्व जहाजांना परवानगी देत नाही, तोपर्यंत होर्मुजमधील परिस्थितीवर कडक नियंत्रण ठेवले जाईल. इराणच्या घोषणेनंतर आता होर्मुझमधील तणाव पुन्हा एकदा वाढला आहे.
