इराण आणि अमेरिका यांच्यातील तणाव वाढला आहे. यामध्येच इराणकडून अमेरिकेने केलेल्या नाकेबंदीचा विरोध केला जात आहे. नाकेबंदी हटवण्याची मागणी केली जात आहे. अमेरिकेच्या नाकेबंदीमुळे एकही जहाज बंदरातून बाहेर पडू शकत नाही. अमेरिकेची नाकेबंदी असताना इराणी जहाज तुस्का जात असताना अमेरिकेने त्याच्यावर मोठा हल्ला करत आपल्या ताब्यात घेतले. या घटनेनंतर इराणकडून संताप व्यक्त केला जात आहे. मंगळवारी शांतता करार बैठकीचे आयोजन करण्यात आले होते. मात्र, त्यापासून दूर राहण्याचा निर्णय इराणकडून घेण्यात आला. होर्मुज खाडीत करण्यात आलेल्या नाकेबंदीनंतर बैठकीस बसणे शक्य नसल्याचे इराणकडून स्पष्ट करण्यात आले. यादरम्यान अमेरिकेने शस्त्रसंधीची घोषणा केली. अमेरिकेने केलेल्या शस्त्रसंधीमागे काहीतरी मोठा कट असल्याची शंका इराणकडून उपस्थित केली जात आहे.
यादरम्यानच आता इराण अमेरिकेच्या विरोधात आक्रमक भूमिका घेत आहे. अमेरिकेने इराणचे तुस्का जहाज ताब्यात घेतले, याविरोधात इराणने संयुक्त राष्ट्राला पत्र लिहिले. अमेरिका आमच्या अधिकारांवर अतिक्रमण करत असल्याचे त्यांनी त्यामध्येच म्हटले. अमेरिकेच्या या कारवाई त्यांनी विरोध केला. अजून एक जहाज इराणचे अमेरिकेने ताब्यात घेतल्याचे कळत आहे.
इराणच्या सरकारी टीव्ही अँकर्सनी आयआरजीसीच्या केंद्रीय मुख्यालय खतम अल-अंबियाचे प्रवक्ते इब्राहिम झोल्फघारी यांचे निवेदन वाचतानाचा ऑडिओ आणि व्हिडिओ प्रसारित केला. वारंवार दिल्या जाणाऱ्या धमक्यांवर त्यांनी इशारा दिला. इस्लामिक इराणवर कोणतेही आक्रमण नाही तर कारवा झाल्यास इस्लामिक प्रजासत्ताकचे शस्त्र दल पूर्ण ताकदीने उत्तर देईल.
लहान मुलांची हत्या करणाऱ्या झायोनिस्ट राजवटीला इस्रायलला पूर्वी कधीही न शिकवलेला धडा शिकवेल, असेही त्यांनी म्हटले. इराण आणि अमेरिका युद्धात मध्यस्थीसाठी बैठकांचे आयोजन केले जात असतानाच मध्य पूर्वेत स्थिती अधिक चिघळताना दिसत आहे. दोन्ही देश आक्रमक भूमिकेत आहेत. अमेरिकेने नाकेबंदी काढली पाहिजे, या मागणीवर इराण ठाम आहे. त्यामध्येच इराणकडून आता संयुक्त राष्ट्राकडे धाव घेण्यात आली. यामध्ये संयुक्त राष्ट्र नक्की काय भूमिका घेतो, हे पाहण्यासारखे ठरणार आहे.
