Bengal Election Result 2026: बंगालच्या मुख्यमंत्री ममता बॅनर्जी यांनी गंभीर आरोप केला आहे. राज्यात मतमोजणीच्या आदल्या रात्री भारनियमन (Load-shedding) हे हेतुपुरस्सर लादले जात असल्याचा आरोप केला. खासदार महुआ मोईत्रा यांनीही हाच आरोप केला.
ममता बॅनर्जी यांनी म्हटलं आहे की, मला विविध ठिकाणांहून असे अहवाल मिळत आहेत की, भारनियमन (Load-shedding) हे हेतुपुरस्सर लादले जात आहे. हुगळी येथील श्रीरामपूर आणि नादिया येथील कृष्णनगरपासून ते बर्धमान येथील ऑसग्राम आणि कोलकाता येथील खुदीराम अनुशीलन केंद्रापर्यंत अशा अनेक ठिकाणी काही घटना उघडकीस आल्या आहेत; जिथे टप्प्याटप्प्याने भारनियमन केले जात आहे, सीसीटीव्ही (CCTV) कॅमेरे बंद केले जात आहेत आणि 'स्ट्राँग रूम्स'मधून (मतपेट्या ठेवलेल्या खोल्यांमधून) वाहनांची ये-जा सुरू आहे.
मी माझ्या पक्षाच्या कार्यकर्त्यांना आवाहन करत आहे: ज्याप्रमाणे मी स्वतः सर्व गोष्टींवर लक्ष ठेवण्यासाठी रात्रभर जागून राहत आहे, त्याचप्रमाणे तुम्हीही रात्रभर जागून राहा आणि 'स्ट्राँग रूम्स'मध्ये सुरक्षित असलेल्या जनतेच्या मतांचे रक्षण करा. जर कोणीही, कोणत्याही ठिकाणी, एखादी संशयास्पद परिस्थिती निर्माण करण्याचा प्रयत्न केला, तर त्यांना घेराव घाला; तात्काळ तक्रारी दाखल करा आणि सीसीटीव्ही फुटेजची मागणी करा. हे सर्व काही भाजपच्या इशाऱ्यावर केले जात आहे.
CCTV Cameras switched off in strongroom of 4 ACs of Krishnanagar North 83, Chapra 82, Kaliganj 80 & Nakashipara 81 from 23:52 hrs for 2 minute 16 secs. We are awake @ECISVEEP & @CEOWestBengal - you up to your tricks again? pic.twitter.com/0dFjtiiglX
— Mahua Moitra (@MahuaMoitra) May 3, 2026
टीएमसी खासदार महुआ मोईत्रा यांनी आरोप केला आहे की, बंगालमधील चार स्ट्रॉंगरूममधील सीसीटीव्ही कॅमेरे 23:52 वाजल्यापासून दोन मिनिटे आणि 16 सेकंदांसाठी बंद करण्यात आले होते. ज्या चार स्ट्रॉंगरूममधील सीसीटीव्ही कॅमेरे बंद करण्यात आले होते, त्यांमध्ये कृष्णनगर नॉर्थ 83, छपरा 82, कालिगंज 80 आणि नकाशीपारा 81 यांचा समावेश आहे.
दरम्यान, बंगालच्या 293 मतदारसंघांमध्ये मतमोजणी सुरू झाली आहे. प्रथम पोस्टल मतपत्रिकांची मोजणी होत असून, त्यानंतर सकाळी 8:30 वाजता ईव्हीएम सुरू होतील. एका जागेवर (फाल्टा) 21 मे रोजी फेरनिवडणूक होणार आहे. पश्चिम बंगालमध्ये मतमोजणी सुरू होण्यापूर्वी सकाळी 6:30 वाजता भवानीपूरमधील सखावत मेमोरियल स्कूलबाहेर टीएमसी आणि भाजपच्या एजंटांमध्ये संघर्ष झाला. भवानीपूर मतदारसंघातून ममता बॅनर्जी आणि सुवेंदू अधिकारी निवडणूक लढवत आहेत. बंगालमध्ये 15 वर्षे सत्तेवर असलेल्या ममता बॅनर्जी चौथ्यांदा सत्तेवर परतणार की भाजप पहिल्यांदाच सरकार स्थापन करणार, याचे उत्तर काही तासांत स्पष्ट होईल.
इतर महत्वाच्या बातम्या
