मुंबईतील वानखेडे स्टेडियममध्ये आयपीएल 2026 स्पर्धेत आज 4 मे रोजी 47 व्या सामन्याचा थरार रंगणार आहे. या सामन्यात होम टीम मुंबई इंडियन्ससमोर लखनौ सुपर जायंट्सचं आव्हान आहे. दोन्ही संघांची या मोसमात निराशाजनक कामगिरी राहिली आहे. लखनौला 8 पैकी 2 सामनेच जिंकता आले आहेत. तर मुंबईला वानखेडे स्टेडियममध्ये या हंगामात 5 पैकी सलग 4 सामन्यांमध्ये पराभूत व्हावं लागलं आहे. त्यामुळे मुंबई तिसरा विजय मिळवण्यासह वानखेडेतील पराभवाची मालिका खंडीत करणार का हे पाहणं महत्त्वाचं ठरणार आहे.

मुंबईने टॉस जिंकला

मुंबई विरुद्ध लखनौ सामन्याला संध्याकाळी 7 वाजून 30 मिनिटांनी सुरुवात होणार आहे. त्याआधी 7 वाजता टॉस झाला. मुंबई/लखनौच्या बाजूने नाणेफेकीचा कौल लागला. कॅप्टन सूर्यकुमार यादव याने बॉलिंगचा निर्णय घेत लखनौला बॅटिंगसाठी भाग पाडलं आहे.

रोहित शर्माचं कमबॅक

ऑलराउंडर हार्दिक पंड्या मुंबईचा नियमित कर्णधार आहे. मात्र हार्दिकची तब्येत बरी नसल्याने त्याला लखनौ विरूद्धच्या सामन्याला मुकावं लागलं आहे, अशी माहिती हंगामी कर्णधार सूर्यकुमार यादव याने दिली आहे. तसेच रोहित शर्मा याचं कमबॅक झालं आहे. मात्र मुंबईची दुसऱ्या डावात बॅटिंग असल्याने रोहित इम्पॅक्ट प्लेअर म्हणून खेळणार आहे. त्यामुळे रोहित कशी कामगिरी करतो हे पाहणं महत्त्वाचं ठरणार आहे. रोहितला आरसीबी विरुद्ध झालेल्या दुखापतीनंतर बऱ्याच सामन्यांना मुकावं लागलं होतं.

वानखेडेतील आकडेवारी

वानखेडे स्टेडियममध्ये 2026 वर्षांत आतापर्यंत एकूण 13 सामने खेळवण्यात आले आहेत. या 13 पैकी 7 वेळा पहिले बॅटिंग करणाऱ्या टीमचा विजय झाला आहे. तर 6 वेळा चेजिंग करणाऱ्या संघाने विजय मिळवला आहे.

हेड टु हेड रेकॉर्ड्स

मुंबई इंडियन्स विरुद्ध लखनौ सुपर जायंट्स यांच्यातील हा नववा सामना असणार आहे. याआधी उभयसंघात 8 सामने खेळवण्यात आले आहेत. लखनौ या 8 पैकी सर्वाधिक सामन्यांत मुंबईवर वरचढ राहिली आहे. लखनौने मुंबईला 6 सामन्यांत पराभूत केलं आहे. तर मुंबईला केवळ 2 सामनेच जिंकता आले आहेत.

मुंबई आणि लखनौची सारखीच स्थिती

मुंबई इंडियन्सने 5 वेळा आयपीएल ट्रॉफी जिंकली आहे. मात्र मुंबईची या मोसमात आतापर्यंत सुमार कामगिरी राहिली आहे. मुंबईने या हंगामात 9 पैकी 7 सामने गमावले आहेत. तर मुंबईला केवळ 2 सामनेच जिंकता आले आहेत. मुंबई पॉइंट्स टेबलमध्ये नवव्या स्थानी आहे. तर लखनौने 8 पैकी 2 सामन्यांत प्रतिस्पर्धी संघावर मात केली आहे. लखनौ पॉइंट्स टेबलमध्ये शेवटून पहिल्या अर्थात दहाव्या क्रमांकावर आहे.

लखनौ सुपर जायंट्स प्लेइंग ईलेव्हन : मिचेल मार्श, एडन मार्करम, ऋषभ पंत (कर्णधार आणि विकेटकीपर), जोश इंग्लिस, निकोलस पूरन, अक्षत रघुवंशी, हिम्मत सिंग, मोहम्मद शमी, मोहसीन खान, आवेश खान आणि प्रिन्स यादव.

मुंबई इंडियन्स प्लेइंग ईलेव्हन: रायन रिकेल्टन (विकेटकीपर), नमन धीर, सूर्यकुमार यादव (कॅप्टन), तिलक वर्मा, विल जॅक्स, राज बावा, कॉर्बिन बॉश, दीपक चहर, जसप्रीत बुमराह, अल्लाह गझनफर आणि रघु शर्मा.