जुन्नर, ता. ६ : महाराष्ट्र राज्याच्या निर्मितीचा ऐतिहासिक वारसा जपण्यासाठी सांस्कृतिक कार्य विभागातर्फे गुरुवारी (ता. ७) जुन्नरमध्ये महाराष्ट्राची लोकधारा आणि वारकरी चित्ररथ दिंडीचे आयोजन केले आहे. आमदार शरद सोनवणे यांनी या विशेष महोत्सवासाठी साडेनऊ लाखांचा निधी मंजूर झाल्याची माहिती दिली.
किल्ले शिवनेरीवर २७ एप्रिल १९६० रोजी झालेल्या मंगल कलश पूजनाच्या स्मृतींना उजाळा देण्यासाठी हा सोहळा होत आहे. गुरुवारी सायंकाळी ६ ते ८ या वेळेत सिद्धिविनायक मंदिर ते गणपती विसर्जन मार्गावर वारकरी चित्ररथ दिंडी निघणार आहे. त्यानंतर धान्यबाजार येथे ‘द फोक महाराष्ट्राची लोकधारा’ हा कार्यक्रम होईल. सह्याद्री गिरीभ्रमण संस्था आणि कलोपासक संस्थांच्या मागणीनुसार मुख्यमंत्री देवेंद्र फडणवीस यांनी या उपक्रमाला तात्काळ मान्यता दिली आहे.

महाराष्ट्राच्या जडणघडणीचा इतिहास लोकांपर्यंत पोहोचावा, या उद्देशाने सह्याद्री संस्थेने मांडलेल्या प्रस्तावास मुख्यमंत्र्यांनी अनुमती दिली. आमदार सोनवणे यांच्या पुढाकारामुळे हा महोत्सव आता दरवर्षी साजरा होणार आहे.
-राहुल जोशी, अध्यक्ष, सह्याद्री गिरिभ्रमण संस्था, जुन्नर.