विजय पाटील, सांगली | साम टीव्ही

सांगलीच्या जत तालुक्यात तीन वर्षांपूर्वी घडलेल्या दुहेरी हत्याकांडातील मुख्य साक्षीदाराची अपहरण करून हत्या केल्याची धक्कादायक घटना घडली आहे. कर्नाटकातील एका गावात साक्षीदाराचा मृतदेह एका झाडाला लटकलेल्या अवस्थेत आढळला. न्यायालयात जाण्यापूर्वी दुचाकीत पेट्रोल भरून येतो म्हणून ते घराबाहेर पडले होते. त्यावेळी त्यांचे अपहरण झाले. त्यानंतर २४ तासांत त्यांचा मृतदेह आढळला.

दादासाहेब नामदेव यमगर असं हत्या झालेल्या साक्षीदाराचं नाव आहे. सांगलीतील जत तालुक्यातील महानुवाडी येथे झालेल्या दुहेरी हत्याकांडात ते मुख्य साक्षीदार होते. कवठेमहांकाळ तालुक्यातील नागज येथून त्यांचं अपहरण झालं होतं. अपहरण करून त्यांना कर्नाटकात नेले आणि तेथे त्यांची हत्या करण्यात आल्याचे प्राथमिक तपासात उघड झाले आहे. कर्नाटकातील मदभावी येथे एका झाडाला लटकलेल्या अवस्थेत त्यांचा मृतदेह आढळून आला. त्यांच्या शरीरावर मारहाणीच्या जखमाही होत्या.

डिसेंबर २०२३ मध्ये शेतातील सामायिक विहिरीच्या पाणी वाटपावरून यमगर भावकीतील दोन गटात तुंबळ हाणामारी झाली होती. एका गटाने केलेल्या हल्ल्यात विकास नामदेव यमगर आणि प्रशांत दादासाहेब यमगर यांचा मृत्यू झाला होता. यादुहेरी हत्याकांडात दादासाहेब नामदेव यमगर हे मुख्य साक्षीदार होते. या हत्येचा खटला न्यायप्रविष्ठ आहे. या खटल्याची मंगळवारी न्यायालयात तारीख होती. दादासाहेब यमगर यांचा जबाब न्यायालयासमोर नोंदवण्यात येणार होता.

यमगर हे न्यायालयात जाणार होते. त्याआधी दुचाकीमध्ये पेट्रोल भरून येतो असे सांगून ते घरातून निघाले होते. त्यानंतर त्यांचे अपहरण झाले. याबाबत कवठेमहांकाळ पोलीस ठाण्यात अपहरणाची नोंदही करण्यात आली होती. अपहरणानंतर २४ तासांच्या आत कर्नाटकातील मदभावी येथे त्यांचा मृतदेह आढळून आला. झाडाला गळफास लावलेल्या अवस्थेत मृतदेह सापडला होता.