नाशिकच्या टीसीएस (TCS) कंपनीतील महिला कर्मचाऱ्यांचे लैंगिक शोषण, धर्मांतराचा प्रयत्न आणि विनयभंग प्रकरणी संशयित आरोपी निदा खानला छत्रपती संभाजीनगरमधून अटक करण्यात आली आहे. तिला लवकरच कोर्टात हजर केले जाणार असल्याची माहिती समोर आली आहे. निदा खान आणि तिच्या कुटुंबीयांना गुप्त माहितीच्या आधारे अटक करण्यात आली आहे. या प्रकरणात आता एमआयएमचा नगरसेवक मतीन पटेलला सहआरोपी करण्यात आले आहे. हा मतीन पटेल कोण आहे? त्यांच्यावर नेमका आरोप काय आहे याबाबत सविस्तर माहिती जाणून घेऊयात.
एमआयएमचा नगरसेवक मतीन पटेलवर निदा खानला आश्रय दिल्याचा आरोप आहे. आता या प्रकरणात नाशिक पोलिसांनी मोठी कारवाई केली असून निदा खानला आश्रय मतीन पटेल याला सह आरोपी केले आहे. पटेल यांच्या विरोधात नाशिकमध्ये बीएनएसचे कलम 249 अंतर्गत गुन्हा दाखल करण्यात आला आहे. आता त्याला नाशिक गुन्हे शाखेकडून चौकशीसाठी ताब्यात घेतल्याची माहिती सूत्रांनी दिली आहे.
मतीन पटेल हा पहिल्यांदाच एमआयएम पक्षाकडून नगरसेवक म्हणून निवडून आला आहे. यापूर्वी तो एमआयएमचा सक्रिय कार्यकर्ता होता. निवडणूक काळात मतीन पटेल आणि एका महिलेचा अश्लील व्हिडिओ व्हायरल झाला होता. तेव्हा मतीन हा चर्चेत आला होता. त्यावेळी त्याच्यावर मोठी टीकाही झाली होती. मतीन हा एमआयएम नेते आणि माजी खासदार इम्तियाज जलील यांच्या निकटवर्तीय नगरसेवक पैकी एक आहे. तो एमआयएमचा बालेकिल्ला असलेल्या नारेगाव भागातून नगरसेवक आहे. तो याआधीही विविध वादांमुळे चर्चेत होता.
दरम्यान, निदा खान ही 25 मार्चपासून फरार होती आणि गेल्या अनेक दिवसांपासून पोलिसांना गुंगारा देत होती. तिला एमआयएम नगरसेवक मतीन पटेल यांनी आसरा दिला होता. निदा खान ही नारेगावातील कैसर कॉलनी येथील फ्लॅटमध्ये तिची आई, वडील, भाऊ आणि काकीसोबत राहत होती. ती अवघ्या चार दिवसांपूर्वीच या फ्लॅटमध्ये राहण्यासाठी आली होती. पोलिसांना याची माहिती मिळताच या ठिकाणाची रेकी करून सापळा रचून निदा खानला अटक करण्यात आली आहे. आता चौकशीतून आणखी धक्कादायक माहिती समोर येण्याची शक्यता आहे.
