देशातील अनेक शहरांमध्ये CNG च्या दरात वाढ झाल्यानंतर वाहनचालकांच्या खिशावर अतिरिक्त भार पडू लागला आहे. विशेषतः CNG कार वापरणाऱ्यांसाठी दररोजचा प्रवास आता अधिक खर्चिक ठरत आहे. अशा परिस्थितीत प्रत्येक कार मालकाची इच्छा असते की आपल्या गाडीचे मायलेज वाढावे आणि इंधनावरील खर्च कमी व्हावा.

कोणत्याही वाहनाच्या चांगल्या मायलेजसाठी त्याचे इंजिन उत्तम स्थितीत असणे अत्यंत आवश्यक असते. यासाठी स्पार्क प्लग, एअर फिल्टर, फ्यूल फिल्टर आणि इंजेक्टर यांची नियमित तपासणी व स्वच्छता करणे गरजेचे आहे. इंजिन ट्यूनिंग योग्य असल्यास CNG अधिक कार्यक्षमतेने वापरली जाते आणि कारचे मायलेज सुधारते.
अनेक वाहनचालक टायरमधील हवेच्या दाबाकडे दुर्लक्ष करतात. मात्र चुकीचा टायर प्रेशर मायलेज कमी होण्याचे मोठे कारण ठरू शकतो. टायरमध्ये हवा कमी असल्यास रस्त्याशी घर्षण वाढते. त्यामुळे इंजिनला अधिक मेहनत घ्यावी लागते आणि CNG चा वापर वाढतो. म्हणून वेळोवेळी टायर प्रेशर तपासा आणि कंपनीने सुचवलेल्या प्रमाणातच हवा भरून घ्या.

अनेकजण डिकीत गरज नसलेले सामान सतत ठेवतात. लांब प्रवासापूर्वी किंवा रोजच्या वापरासाठी अनावश्यक वस्तू काढून टाका. यामुळे वाहनाचे वजन कमी होईल आणि मायलेज सुधारण्यास मदत मिळेल.