सोशल मीडियावर रील्स बनवून लोकप्रिय झालेल्या रीलस्टार रोहिणी निलेश पाराध्ये यांनी बुधवारी दुपारी आत्महत्या केल्याची धक्कादायक घटना समोर आली आहे. सोलापूर जिल्ह्यातील मंगळवेढा तालुक्यातील ब्रह्मपुरी येथे ही घटना घडली. रोहिणी आणि त्यांचे पती निलेश पाराध्ये हे सोशल मीडियावर सक्रिय होते. त्यांच्या हॉटेलच्या रील्सना मोठी लोकप्रियता मिळाली होती. याच माध्यमातून त्यांनी रत्नागिरी-नागपूर राष्ट्रीय महामार्गालगत “हॉटेल ग्रामपंचायत” हा व्यवसाय सुरू केला होता.

मंगळवारी दुपारी सुमारे 2.30 वाजता हॉटेलच्या स्वयंपाकघरात रोहिणी यांनी गळफास घेतल्याचे समोर आले. पती निलेश यांनी त्यांना तातडीने मंगळवेढा ग्रामीण रुग्णालयात दाखल केले. मात्र डॉक्टरांनी त्यांना मृत घोषित केले. या घटनेनंतर परिसरात हळहळ व्यक्त केली जात आहे.

दरम्यान, आत्महत्येमागचे कारण अद्याप स्पष्ट झालेले नाही. पोलिसांकडून या प्रकरणाचा तपास सुरू आहे. रोहिणी यांच्या निधनानंतर पती निलेश यांनी फेसबुकवर भावूक पोस्ट शेअर करत दुःख व्यक्त केले आहे.