Bhandara Crime News: भंडारा (Bhandara) जिल्ह्यातून नात्याला काळिमा फासणारी एक अत्यंत धक्कादायक आणि हृदयद्रावक घटना समोर आली आहे. घरगुती वादातून एका मद्यपी मुलानं आपल्याच दिव्यांग वडिलांवर फावड्यानं सपासप वार करत बापाचा काटा काढला आहे. ही थरारक घटना भंडारा जिल्ह्यातील तुमसर तालुक्यातील खरबी येथे घडली असून, या घटनेमुळे संपूर्ण परिसरात प्रचंड खळबळ उडाली आहे. तुकडु बावणे (वय 65) असे मृत व्यक्तीचे नाव आहे.
पोलिसांनी दिलेल्या माहितीनुसार, खरबी येथील रहिवासी असलेले 65 वर्षीय तुकडु बावणे हे दिव्यांग होते. त्यांचा 27 वर्षीय मुलगा गणेश उर्फ सोनु बावणे याला दारूचे व्यसन होते. घटनेच्या दिवशी आरोपी मुलगा गणेश आणि वडिलांमध्ये कोणत्यातरी कारणावरून जोरदार वाद सुरू झाला. दारूच्या नशेत धुंद असलेल्या गणेशचा राग अनावर झाला आणि त्याने घरात असलेल्या फावड्याने आपल्या दिव्यांग वडिलांवर थेट हल्ला चढवला. या जीवघेण्या हल्ल्यात गंभीर जखमी झालेल्या तुकडु बावणे यांचा जागीच मृत्यू झाला. आरोपी मुलानं अत्यंत क्रूरपणे आपल्या दिव्यांग बापाचा काटा काढला.
मुलगा आणि वडिलांमध्ये सुरू असलेला वाद आणि हाणामारी पाहून घरात असलेला 15 वर्षीय नातेवाईक आर्यन बावणे हा मध्यस्थी करण्यासाठी धावला. मात्र, नशेत असलेल्या गणेशने आर्यनवरही फावड्याने हल्ला केला. या हल्ल्यात आर्यन गंभीर जखमी झाला आहे. त्याला तातडीने उपचारासाठी तुमसर येथील उपजिल्हा रुग्णालयात दाखल करण्यात आले असून, सध्या त्याच्यावर उपचार सुरू आहेत.
घटनेची माहिती मिळताच मोहाडी पोलिसांनी (Mohadi Police) तातडीने चक्र फिरवून घटनास्थळ गाठले. पोलिसांनी आरोपी मुलगा गणेश उर्फ सोनु बावणे (वय 27) याला अटक (Arrest) केली आहे. या प्रकरणी गुन्हा दाखल करण्यात आला आहे. कौटुंबिक वादातून आणि दारूच्या व्यसनापायी पोटच्या मुलानं वडिलांचा जीव घेतल्याने खरबी गावासह संपूर्ण भंडारा जिल्ह्यात खळबळ उडाली आहे.
इतर महत्त्वाच्या बातम्या
