अमेरिका आणि इराणमधील मतभेदांच्या मुद्यावर अद्यापपर्यंत कोणताही तोडगा निघालेला नाही. त्यामुळे होणार, होणार म्हणून चर्चा असलेल्या शांतता कराराला मुहूर्त मिळत नाहीय. या दरम्यान अमेरिका-इराणकडून परस्परांवर हल्ले, प्रतिहल्ले सुरुच आहेत. आखातामधील तणाव कायम आहे. स्ट्रेट ऑफ हॉर्मुजमध्ये अमेरिका-इराण पुन्हा आमने-सामने आले आहेत. इराणच्या मेहर न्यूज एजन्सीने दिलेल्या वृत्तानुसार शनिवारी इराणने हॉर्मुजमध्ये इशारा म्हणून गोळीबार केला. अमेरिकन युद्ध नौकांच्या हालचाली पाहून हा गोळीबार करण्यात आला असा इराणचा दावा आहे. समुद्रात लारक बेटापासून थोडा दूर गोळीबार केला असं इराणने म्हटलं आहे. दुसरीकडे अमेरिकी अधिकाऱ्याने म्हटलय की, इराणने स्ट्रेट ऑफ हॉर्मुजमध्ये अनेक ड्रोन्स डागले, जे नष्ट करण्यात आले.

इराणचे चार ड्रोन्स पाडल्यानंतर किनारपट्टीवरील इराणच्या रडार सिस्टिमवर हल्ला केल्याचं अमेरिकी सेंट्रल कमांडने म्हटलं आहे. या ड्रोन्समुळे समुद्री वाहतुकीला अडथळा निर्माण झाला होता. पुढे असे हल्ले होऊ नयेत म्हणून आम्ही गोरुक आणि केशम बेटावरील इराणच्या रडार सिस्टिमला टार्गेट केलं असं अमेरिकेने म्हटलं आहे. केशम बेट अब्बास बंदर आणि लारेक बेटाजवळ आहे. स्वसंरक्षणासाठी इराणच्या आक्रमकतेला उत्तर देत राहणार असं अमेरिकेने म्हटलं आहे.

तणाव आणखी वाढणार

ही घटना घडण्याच्या काहीवेळ आधी अमेरिकी राष्ट्रपती डोनाल्ड ट्रम्प यांनी एक इंटरव्यू दिलेला. त्यात त्यांनी दावा केलेला की, इराणकडे आता 21 ते 22 टक्के मिसाइल्सच शिल्लक राहिली आहेत. दोन्ही देशांमध्ये सीजफायर वाढणार अशी चर्चा असतानाच हा हल्ला झाल्याने तणाव आणखी वाढणार आहे. या आठवड्याच्या सुरुवातीला इराणने कुवेत एअर पोर्टवर ड्रोन हल्ला केला होता. त्यात एका प्रवाशी टर्मिनलचं मोठ्या प्रमाणात नुकसान झालं होतं. एका भारतीयाचा मृत्यू झाला होता. अनेक लोक जखमी झाले होते. काहीवेळासाठी विमानतळ बंद करण्यात आला होता.

आम्ही जिंकणारचं

युद्धविरामाच्या आडून अमेरिका-इराणमध्ये हा संघर्ष सुरु आहे. तणाव वाढलेला असताना प्रशासन यशस्वीपणे हा संघर्ष समाप्त करण्याच्या दिशेने पावलं टाकत आहे असा ट्रम्प यांचा दावा आहे. आम्ही जिंकणारचं असा ट्रम्प यांनी पत्रकारांशी बोलताना दावा केला.