अवघ्या 15 दिवसांपूर्वी सोशल मीडियावर सुरू झालेल्या कॉकरोच जनता पार्टी (CJP) या चळवळीने अल्पावधीतच तरुणाईचे लक्ष वेधून घेतले आहे. डिजिटल माध्यमांवर सक्रिय असलेली ही चळवळ आता प्रत्यक्ष आंदोलनाच्या मैदानात उतरली असून, दिल्लीतील जंतर-मंतर येथे आंदोलनाची हाक देण्यात आली आहे. कॉकरोच जनता पार्टीचे संस्थापक अभिजीत दीपके हे आंदोलनाच्या तयारीसाठी दिल्लीत दाखल झाले आहेत. त्यांनी पक्षाच्या कार्यकर्त्यांना आणि समर्थकांना आंदोलनात सहभागी होण्याचे आवाहन केले आहे. “एक पुस्तक आणि एक तिरंगा घेऊन आंदोलनात सहभागी व्हा,” असे आवाहन त्यांनी केले आहे.

दरम्यान, नीट (NEET) पेपरफुटी प्रकरणावरून कॉकरोच जनता पार्टीने केंद्र सरकारवर निशाणा साधला आहे, शिक्षण व्यवस्थेतील कथित त्रुटींविरोधात आवाज उठवण्यासाठी हे आंदोलन आयोजित करण्यात आल्याचे सांगण्यात येत आहे. अभिजीत दीपके सकाळी दिल्ली आंतरराष्ट्रीय विमानतळावर पोहोचल्यानंतर आंदोलनासाठी आवश्यक परवानगी मिळवण्यासाठी पार्लियामेंट स्ट्रीट पोलीस ठाण्यात जाणार असल्याची माहिती देण्यात आली. कायद्याच्या चौकटीत राहून आणि लोकशाही मार्गाने आंदोलन केले जाईल, असे आयोजकांनी स्पष्ट केले आहे.

आंदोलनात सहभागी होणाऱ्यांना तिरंगा, पुस्तके आणि फुले घेऊन येण्याचे आवाहन करण्यात आले आहे. तसेच युवकांसह पालक, कुटुंबीय आणि नागरिकांनीही या आंदोलनात सहभागी व्हावे, असे आवाहन पक्षाकडून करण्यात आले आहे. जंतर-मंतर परिसरात आंदोलनाच्या पार्श्वभूमीवर सुरक्षा व्यवस्था कडक करण्यात आली आहे. विमानतळापासून जंतर-मंतरपर्यंत विविध ठिकाणी मोठ्या प्रमाणावर पोलीस बंदोबस्त तैनात करण्यात आला असून, वाहनांची आणि सामानाची तपासणी सुरू आहे. कोणताही अनुचित प्रकार घडू नये यासाठी प्रशासनाने विशेष खबरदारी घेतली आहे.

दरम्यान, सोशल मीडियावरून सुरू झालेली ही चळवळ प्रत्यक्ष रस्त्यावर कितपत प्रभाव निर्माण करते आणि तरुणाईचा तिला किती प्रतिसाद मिळतो, याकडे आता सर्वांचे लक्ष लागले आहे.