न्यूझीलंड क्रिकेट टीम टॉम लॅथम याच्या नेतृत्वात इंग्लंड दौऱ्यातील कसोटी मालिकेची सुरुवात विजयाने करण्यात अपयशी ठरली आहे. इंग्लंडने बेन स्टोक्स याच्या कॅप्टन्सीत ऐतिहासिक लॉर्ड्स क्रिकेट ग्राउंडमध्ये न्यूझीलंडवर सामन्यातील चौथ्याच दिवशी (7 जून) 115 धावांच्या मोठ्या फरकाने विजय मिळवला. इंग्लंडने यासह 3 सामन्यांच्या मालिकेत 1-0 ने आघाडी मिळवली. इंग्लंडने या विजयासह मालिका विजयाचा दावा मजबूत केला आहे. तर पाहुण्या न्यूझीलंडला पराभवासह आणखी एक झटका लागला आहे. किवींची पराभवानंतर वर्ल्ड टेस्ट चॅम्पियनशीप 2025-2027 या साखळीतील पॉइंट्स टेबलमध्ये घसरण झाली आहे. इंग्लंड-न्यूझीलंड सामन्यानंतर पॉइंट्स टेबलमध्ये कोण कोणत्या स्थानी आहे हे जाणून घेऊयात.
न्यूझीलंड इंग्लंड विरूद्धच्या पहिल्या कसोटी सामन्याआधी पॉइंट्स टेबलमध्ये दुसऱ्या स्थानी विराजमान होती. मात्र 115 धावांनी झालेल्या मोठ्या पराभवामुळे न्यूझीलंडची थेट चौथ्या स्थानी घसरण झाली आहे. तर इंग्लंडला मोठ्या विजयानंतरही पॉइंट्स टेबलमध्ये काहीही फायदा झालेला नाही. इंग्लंड सातव्या स्थानी कायम आहे.
ताज्या आकडेवारीनुसार, पॉइंट्स टेबलमध्ये ऑस्ट्रेलिया पहिल्या स्थानी विराजमान आहे. ऑस्ट्रेलियाच्या खात्यात 84 गुण आहेत. ऑस्ट्रेलियाने या साखळीत खेळलेल्या 8 पैकी 7 सामन्यांत विजय मिळवला आहे. तर ऑस्ट्रेलियाने फक्त 1 सामना गमावला आहे.
तसेच दक्षिण आफ्रिकेला इंग्लंडच्या विजयामुळे फायदा झाला आहे. दक्षिण आफ्रिकेच्या खात्यात 36 गुण आहेत. श्रीलंका तिसऱ्या आणि न्यूझीलंड चौथ्या स्थानी आहे. बांगलादेश पाचव्या क्रमांकावर आहे.
टीम इंडिया सहाव्या स्थानी आहे. इंग्लंड सातव्या आणि पाकिस्तान आठव्या स्थानी आहे. तर वेस्ट इंडिज डब्ल्यूटीसी 2025-2027 या साखळीतील पॉइंट्स टेबलमधील नवव्या आणि शेवटच्या स्थानी आहे.
WTC 2025-2027 पॉइंट्स टेबलमधील स्थिती
दरम्यान क्रिकेट चाहत्यांना इंग्लंड विरुद्ध न्यूझीलंड यांच्यातील दुसर्या कसोटी सामन्याची प्रतिक्षा असणार आहे. उभयसंघातील दुसरा सामना हा 17 ते 21 जून दरम्यान खेळवण्यात येणार आहे. या सामन्याचं आयोजन हे लंडनमधील केनिंग्टन ओव्हलमध्ये करण्यात आलं आहे. न्यूझीलंडला मालिकेतील आव्हान कायम राखण्यासाठी कोणत्याही स्थितीत हा सामना जिंकावा लागणार आहे.
