इंग्लंडने न्यूझीलंडविरुद्धच्या कसोटी मालिकेतील पहिला सामना जिंकला आहे. लॉर्ड्सवर खेळल्या गेलेल्या या सामन्यात इंग्लंडने चौथ्याच दिवशी (रविवारी, ७ जून) ११५ धावांनी विजय मिळवला. या सामन्याच्या निकालाने आयसीसी वर्ल्ड टेस्ट चॅम्पियनशीप २०२५-२७ (WTC) च्या पॉइंट्स टेबलमध्ये मोठा बदल झाला आहे. फलंदाजीसाठी कठिण असलेल्या या खेळपट्टीवर न्यूझीलंडसमोर चौथ्या डावात विजयासाठी २५४ धावांचे लक्ष्य होते.

या सामन्याला हवामानाचा मोठा परिणाम झाला. पहिल्या डावात इंग्लंड १४० धावांवर सर्वबाद झाल्यानंतर त्यांच्या गोलंदाजांनी न्यूझीलंडला ११३ धावसंख्येवर रोखले. दुसऱ्या डावात याच कसोटीत पदार्पण केलेल्या एमिलिओ गेने ५७ धावांची खेळी करत यजमानांना चांगली सुरूवात करून दिली. इंग्लंडने दुसऱ्या डावात २२६ धावा केल्या.

प्रत्युत्तरात न्यूझीलंडची फलंदाजी फळी पुन्हा संघर्ष करताना दिसली. पावसामुळे तिसऱ्या दिवशी १० पेक्षा कमी षटके खेळण्यात आली. चौथ्या दिवसाची सुरूवात ५५/५ या धावसंख्येवरून केल्यानंतर ग्लेन फिलिप्सच्या झुंजार नाबाद ४४ धावा करूनही न्यूझीलंडचा संघ १३८ धावसंख्येवर गारद झाला. या सामन्यात इंग्लंडचा वेगवान गोलंदाज ऑली रॉबिन्सन स्टार ठरला, त्याने पहिल्या डावात ५ विकेट्स घेतल्यानंतर दुसऱ्या डावात २९ धावा आणि २/३८ अशी कामगिरी केली.

ॲशेस मालिके ऑस्ट्रेलियाकडून झालेल्या ४-१ च्या दारुण पराभवातून सावरण्याचा प्रयत्न करणाऱ्या इंग्लंडसाठी हे मायदेशी परतणे आनंदाचे ठरले. त्यांच्यासाठी हा विजय महत्त्वाचा ठरला.

न्यूझीलंडविरुद्धच्या तीन कसोटी सामन्यांपैकी पहिला सामना जिंकल्यानंतरही, इंग्लंड संघ WTC च्या पॉइंट्स टेबलमध्ये सातव्या स्थानावर कायम आहे. त्यांनी आतापर्यंत खेळलेल्या ११ सामन्यांमध्ये चार विजय मिळवले आहेत. दुसरीकडे, न्यूझीलंडला धक्का बसला आहे. ते पहिल्या दोन स्थानांवरून घसरले असून, चार सामन्यांमध्ये ५८.३३ टक्के विजयांसह सध्या चौथ्या स्थानावर आहेत.

आपल्या आठपैकी सात सामने जिंकून ऑस्ट्रेलिया (८७.५० टक्के) अजूनही गुणतालिकेत अव्वल स्थानी आहे. तसेच भारत (४८.१५ टक्के) सहाव्या स्थानी आहे. दुसऱ्या स्थानी दक्षिण आफ्रिका (७५ टक्के) असून तिसऱ्या स्थानी श्रीलंका (५८.३३) आहे. बांगलादेश (५८.३३) पाचव्या स्थानी आहे.