Argentina vs Algeria Fifa World Cup 2026 Marathi Football News : अर्जेंटिनाचा संघ कॅन्सस सिटीमधील ॲरोहेड स्टेडियमवर अल्जेरियाविरुद्ध आपल्या फिफा फुटबॉल वर्ल्ड कप २०२६ विजेतेपदाच्या बचावाला सुरुवात करत आहे. जगातील महान फुटबॉलपटू लिओनेल मेस्सी ( Lionel Messi ) आणि त्याचे सहकारी या वर्ल्ड कप स्पर्धेत उतरताना उत्कृष्ट फॉर्ममध्ये आहेत आणि ब्राझीलनंतर (१९६२) वर्ल्ड कप विजेतेपद राखणारा पहिला संघ बनण्याचे त्यांचे ध्येय आहे. तेच, अल्जेरिया २०१४ नंतर प्रथमच विश्वचषकात सहभागी होत आहे. पण, या सामन्यासाठी मैदानावर उतरताच मेस्सीने वर्ल्ड रेकॉर्ड नावावर केला.

मेस्सी मैदानावर उतरला तो, सहा वर्ल्ड कप खेळणारा जगातील पहिल्या खेळाडूचा मान पटकावत.. अर्जेंटिनाच्या या सुपरस्टारने २००६ ते २०२६ या कालावधीत सहा वर्ल्ड कप खेळले आणि २०२२ मध्ये जेतेपदाचे स्वप्नही पूर्ण केले. मेक्सिकोच्या ग्युइलेर्मो ओचोआ याला सहा वर्ल्ड कप खेळणाऱ्या पहिल्या खेळाडूचा मान पटकावता आला असता, परंतु मेक्सिकोने त्याला पहिल्या सामन्यात बाकावर बसवले... आज संध्याकाळी काँगोविरुद्ध मैदानावर उतरताच पोर्तुगालचा ख्रिस्तियानो रोनाल्डोही हा विक्रम नावावर करेल.

मेस्सीने २००६ मध्ये जर्मनीत झालेल्या वर्ल्ड कप स्पर्धेतून आपल्या प्रवासाची सुरुवात केली होती. त्यानंतर २०१०, २०१४, २०१८, २०२२ आणि आता २०२६ अशा सलग सहा वर्ल्ड कपमध्ये त्याने अर्जेंटिनाचे प्रतिनिधित्व केले आहे. अल्जेरियाविरुद्ध मैदानावर उतरताच, तो अर्जेंटिनाकडून २०० वा सामना खेळणारा पहिला खेळाडू ठरला. त्याने संघासाठी सर्वाधिक ११७ गोल व सर्वाधिक ६१ सहाय्य केले आहेत. २०० सामने खेळणारा तो जगातील तिसरा ( रोनाल्डो २२८ व कुवैतचा बादेर अल-मुतावा २०२) खेळाडू ठरला.