आयसीसी वुमन्स टी 20i वर्ल्ड कप 2026 स्पर्धेतील 10 व्या सामन्यात 17 जून रोजी टीम इंडिया विरुद्ध नेदरलँड्स आमनेसामने होते. भारतीय संघाने या सामन्यात नेदरलँड्सवर एकतर्फी विजय मिळवला. भारताने या सामन्यात नेदरलँड्सवर 95 धावांनी मात केली. भारताने यासह या स्पर्धेतील सलग आणि एकूण दुसरा विजय मिळवला. भारताने नेदरलँड्सआधी पाकिस्तानला पराभूत करत स्पर्धेत विजयी सलामी दिली होती. भारताने सलग 2 विजयासह 4 गुण कमावले आहेत. भारताला नेदरलँड्स विरूद्धच्या विजयानंतर मोठा फायदा झाला आहे. भारताने ऑस्ट्रेलियाला पछाडत पॉइंट्स टेबलमध्ये पहिल्या स्थानी झेप घेतली आहे.

आयसीसी वुमन्स टी 20i वर्ल्ड कप 2026 स्पर्धेत यंदा एकूण 12 संघ सहभागी झाले आहेत. या 12 संघांना 6-6 नुसार 2 गटात विभागण्यात आलं आहे. त्यानुसार टीम इंडिया ए ग्रुपमध्ये आहे. विजयामुळे 2 गुण मिळतात. मात्र नेट रनरेट हा एखादा संघ किती धावांनी तसेच किती बॉलआधी विजयी झालाय? याआधारे ठरत असतो. टीम इंडियाने आपले दोन्ही सामने धावांनी जिंकले आहेत. भारताने पहिल्या सामन्यात पाकिस्तानचा 64 धावांनी धुव्वा उडवला आहे. तर आता नेदरलँड्सला 95 धावांनी लोळवलं आहे. त्यामुळे भारताचा नेट रनरेट चांगलाच वाढला आहे.

टीम इंडिया ए ग्रुपमध्ये ऑस्ट्रेलियाला मागे टाकत पहिल्या स्थानी विराजमान झाली आहे. भारताचा नेट रनरेट हा 3.975 असा आहे. तर ऑस्ट्रेलियाची दुसऱ्या स्थानी घसरण झालीय. ऑस्ट्रेलियाने 2 पैकी 2 सामने जिंकले आहेत. ऑस्ट्रेलियाचा नेट रनरेट हा 3.875 असा आहे.

प्रत्येक संघाला साखळी फेरीत प्रत्येकी 5 सामने खेळायचे आहेत. भारतीय संघाने 2 सामने खेळले आहेत. तर भारतासमोर तिसऱ्या सामन्यात दक्षिण आफ्रिकेचं आव्हान असणार आहे. दक्षिण आफ्रिका पॉइंट्स टेबलमध्ये तिसऱ्या स्थानी आहे. बांगलादेशने 2 पैकी 1 सामना जिंकलाय. बांगलादेश एका विजयासह चौथ्या स्थानी आहे. पाकिस्तान पाचव्या आणि नेदरलँड्स सहाव्या स्थानी आहेत.

दरम्यान बी ग्रुपमधून पॉइंट्स टेबलमध्ये पहिल्या स्थानी कोण आहे? हे जाणून घेऊयात. यजमान इंग्लंड अव्वल स्थानी आहे. इंग्लंड या स्पर्धेत आतापर्यंत अजिंक्य आहे. इंग्लंडने खेळलेल्या दोन्ही सामन्यात विजय मिळवला आहे. स्कॉटलँड आणि विंडीज दोन्ही संघ अजिंक्य असून त्यांनी 1-1 सामना जिंकला आहे. स्कॉटलँड दुसऱ्या आणि विंडीज तिसऱ्या स्थानी आहे. श्रीलंकेने 2 पैकी 1 सामना जिंकलाय. श्रीलंका चौथ्या स्थानी आहे. न्यूझीलंड आणि आयर्लंड दोन्ही सामन्यांमध्ये पराभव झालाय. न्यूझीलंड पाचव्या आणि आयर्लंड सहाव्या स्थानी आहे.