महाराष्ट्राचं राजकारण पुन्हा एकदा ढवळून निघालं आहे. महाराष्ट्राचे माजी मुख्यमंत्री उद्धव ठाकरे यांच्या गटाच्या सहा खासदारांनी बंडाचं निशाण फडकवलं आहे. त्यामुळे यूबीटी शिवसेनेते अस्वस्थतता निर्माण झाली आहे. मागच्या चार वर्षात यूबीटी शिवसेनेत दुसऱ्यांदा फूट पडत आहे. मधल्या काळात बऱ्याच पदाधिकाऱ्यांनी, कार्यकर्त्यांनी उद्धव ठाकरेंची साथ सोडून एकनाथ शिंदे यांच्या शिवसेनेत प्रवेश केला. खासदारांनंतर आता अनेक उद्धव गटाचे आमदारही पक्षांतर करु शकतात अशा चर्चा राजकीय वर्तुळात सुरु आहेत. या चर्चांदरम्यान एकनाथ शिंदे यांच्या शिवसेनेचे प्रवक्त किरण पावस्कर यांनी एक मोठं स्टेटमेंट केलं आहे. “आम्ही तुम्हाला देऊ शकू अशी कुठलीही बातमी आमच्याकडे नाही. पण आमदार जनतेने निवडून दिले आहेत. अनेक आमदार शिवसेनेच्या मतदारांनी निवडून दिले आहेत. अशावेळी निवडून आलेले लोकप्रतिनिधी कुठल्या एक गटाशी संबंधित नाहीत” असं किरण पावस्कर म्हणाले.

“वर्तमानात हे आमदार यूबीटीगटासोबत आहेत आणि त्यांचं नेतृत्व त्यांना सांगतं की, तुम्हाला रहायचं असेल तर रहा नाहीतर इथून निघा. पण आमचं नेतृत्व असं बोलत नाही. एकनाथ शिंदे यांचं स्पष्ट सांगणं आहे की, ज्यांना कोणाला जनसेवेसाठी इथे यायचं असेल ते येऊ शकतात. त्यांचं नेहमीच स्वागत आहे” असं किरण पावस्कर बोलले.

विलयाची औपचारिक घोषणा कधी?

महाराष्ट्राच्या राजकारणात नाट्यमय घडामोडी सुरु आहे. उद्धव ठाकरे यांच्या सहा खासदारांनी लोकसभा अध्यक्ष ओम बिर्ला यांना एकनाथ शिंदे यांच्या शिवसेनेत विलीन होण्यासाठी पत्र सोपवल्याचं बोललं जातय. या पत्रावर उद्धव ठाकरे गटाच्या सहा खासदारांची स्वाक्षरी आहे. 21 जून रोजी विलयाची औपचारिक घोषणा होऊ शकते.

स्पेशल फ्लाइटने दिल्लीला  

या खासदारांमध्ये मुंबई उत्तर पूर्वमधून निवडून आलेले खासदार संजय दिना पाटील, शिर्डीतून भाऊसाहेब वाकचौरे, परभणीचे संजय जाधव, हिंगोलीचे नागेश अष्टीकर, वाशिमचे संजय देशमुख आणि धाराशिवचे ओमराजे निंबाळकर या खासदारांचा समावेश आहे. शिवसेना यूबीटीच्या बंडखोर खासदारांनी 17 जून रोजी एकनाथ शिंदे यांची भेट घेतली. एकनाथ शिंदे मंगळवारी स्पेशल फ्लाइटने दिल्लीला गेले. बंडखोर खासदारांचा गटही दिल्लीत आहे. हॉटेलमध्ये एकनाथ शिंदे आणि बंडखोर खासदारांची भेट झाली.