சின்னதிரையில் பிரபலமான நடிகைகளில் ஒருவரான வினுஷா தேவி, தனது வாழ்க்கையின் புதிய அத்தியாயத்தை தொடங்கியுள்ளார். அவரது நிச்சயதார்த்த புகைப்படங்கள் தற்போது சமூக வலைதளங்களில் வெளியாகி வைரலாகி வரும் நிலையில், ரசிகர்கள் மற்றும் திரையுலக நண்பர்கள் அவருக்கு வாழ்த்துகளை தெரிவித்து வருகின்றனர்.

'பாரதி கண்ணம்மா' சீரியலின் மூலம் தமிழ் சின்னத்திரை ரசிகர்களிடையே பிரபலமான வினுஷா தேவி, லிங்கா என்பவருடன் நிச்சயதார்த்தம் செய்து கொண்டுள்ளார். இந்த மகிழ்ச்சியான செய்தி வெளியாகியதையடுத்து, சமூக வலைதளங்களில் அவருக்கு வாழ்த்துக்கள் குவிந்து வருகின்றன. நிச்சயதார்த்த விழாவில் எடுக்கப்பட்ட புகைப்படங்கள் இணையத்தில் வேகமாக பரவி ரசிகர்களின் கவனத்தை ஈர்த்துள்ளன.

மாடலிங் துறையில் தனது பயணத்தை தொடங்கிய வினுஷா தேவி, பல விளம்பர படங்கள் மற்றும் போட்டோஷூட்கள் மூலம் கவனம் பெற்றார். பின்னர் விஜய் டிவியின் மிகப்பெரிய வெற்றி தொடரான 'பாரதி கண்ணம்மா'வில், நடிகை ரோஷினி ஹரிப்ரியன் விலகிய பிறகு கண்ணம்மா கதாபாத்திரத்தில் நடித்தது வினுஷாவின் வாழ்க்கையில் முக்கிய திருப்புமுனையாக அமைந்தது. ஏற்கனவே ரசிகர்களின் மனதில் ஆழமாக பதிந்திருந்த கதாபாத்திரத்தை ஏற்று நடித்ததால் ஆரம்பத்தில் விமர்சனங்களை சந்தித்தாலும், தனது இயல்பான நடிப்பின் மூலம் அந்த சவாலை வெற்றிகரமாக சமாளித்தார்.

தொடர்ந்து 'பாரதி கண்ணம்மா 2' தொடரிலும் முக்கிய கதாபாத்திரத்தில் நடித்த அவர், தனது திறமையை மீண்டும் நிரூபித்தார். தற்போது விஜய் டிவியில் ஒளிபரப்பாகி வரும் 'சுட்டும் விழி சுடரே' தொடரில் கதாநாயகியாக நடித்து வருகிறார். இந்த தொடரிலும் அவரது நடிப்பு ரசிகர்களிடையே நல்ல வரவேற்பைப் பெற்று வருகிறது.

நிச்சயதார்த்த விழாவில் சின்னத்திரை துறையைச் சேர்ந்த பல நடிகர், நடிகைகள் மற்றும் நண்பர்கள் கலந்து கொண்டு வாழ்த்து தெரிவித்துள்ளனர். தற்போது வெளியாகியுள்ள புகைப்படங்கள் ரசிகர்களிடையே பெரும் வரவேற்பைப் பெற்று வரும் நிலையில், வினுஷா தேவியின் திருமண தேதி குறித்த அறிவிப்புக்காக அனைவரும் ஆவலுடன் காத்திருக்கின்றனர்.