Girish Mahajan : भाजपाचे नेते तथा मंत्री गिरीश महाजन यांचे एका तरुणीसोबतचे कथित फोटो सध्या सोशल मीडियावर व्हायरल होत आहेत. या फोटोंचा आधार घेत सोशल मीडियावर वेगवेगळे दावे केला जात आहेत. दुसरीकडे गिरीश महाजन यांनी मात्र संबंधित कथित फोटो खोटे आणि मॉर्फ केलेले आहेत, असे सांगितलेले आहे. दरम्यान, त्यांनी याच प्रकरणावर माध्यमांना आणखी माहिती दिली आहे. त्यांनी काही जुने फोटो दाखवून व्हायरल केले जात असलेले फोटो हे खोटे आहेत, असे सांगिले आहे. तसेच या प्रकरणात खोटे फोटो व्हायरल करणाऱ्यांवर कारवाई करावी, अशी मागणी त्यांनी केली आहे. त्यांनी सायबर पोलिसांकडे तक्रारही केली असून मुख्यमंत्री देवेंद्र फडणवीस यांना याबाबत पत्र लिहिले आहे.

गिरीश महाजन यांनी माध्यमांनी विचारलेल्या प्रश्नांची उत्तरे दिली. यावेळी त्यांनी सध्या व्हायरल होत असलेल्या त्यांच्या कथित फोटोंवरही स्पष्टीकरण दिलं. मी या संदर्भात सायबर पोलिसांकडे तक्रार केली आहे. हे अशा पद्धतीने जे उद्योग केले जात आहेत, त्या रिकाम्या लोकांवर कडक कारवाई झाली पाहिजे. अशा प्रकारांना आळा बसला पाहिजे. मी असेल किंवा कोणीही असेल असे प्रकार करणाऱ्यांविरोधात कारवाई झालीच पाहिजे. एवढं घाणेरडं दाखवलं जात आहे की ते बघवत नाहीये. सोबतच अशा विषयात नेमकं काय करावं हे समजतही नाहीये, असे गिरीश महाजन म्हणाले.

तसेच, फोटोंमध्ये बदल करून, फोटोंना छेडछाड करून कोणाचे कोणाशीही फोटो जोडले जात आहेत. विवस्त्र फोटो जोडले जात आहेत. मला वाटतं ही बाब अतिशय गंभीर आहे, असे मतही त्यांनी व्यक्त केले. मी सायबर विभाग तसेच पोलिसांकडे तक्रार केली आहे. याबाबत मी मुख्यमंत्री मोहोदयांशीही बोललो आहे. त्यांना कारवाई करावी असे पत्र दिले आहे, अशीही माहिती त्यांनी दिली आहे. दरम्यान, आता या प्रकरणात पोलीस नेमकी काय कारवाई करणार, हे पाहणे महत्त्वाचे ठरणार आहे.