EPFO च्या कोट्यवधी खातेधारकांसाठी महत्त्वाची बातमी आहे. EPFO ने आपल्या ऑनलाइन क्लेम प्रणालीच्या अपग्रेडेशनसाठी तीन दिवसांच्या नियोजित मेन्टेन्सची घोषणा केली आहे. त्यामुळे 26 जून ते 28 जून 2026 या कालावधीत EPF क्लेम दाखल करणे आणि त्यांची प्रक्रिया यासंबंधित सेवा तात्पुरत्या बंद राहणार आहेत. EPFO च्या माहितीनुसार, सेवा अधिक दर्जेदार, जलद आणि प्रभावी करण्यासाठी तसेच सदस्यांना अधिक चांगला अनुभव देण्यासाठी हा निर्णय घेण्यात आला आहे. या काळात संस्थेचा डेटाबेस एकत्रीकरण आणि सॉफ्टवेअर प्रणालीचे अपग्रेडेशन करण्यात येणार आहे.

EPFO ने दिलेल्या माहितीनुसार 26 जून 2026 रोजी रात्री 12 वाजल्यापासून ते 28 जून 2026 रोजी रात्री 11:59 वाजेपर्यंत पोर्टलवर नवीन क्लेम दाखल करता येणार नाहीत. तसेच क्लेम प्रक्रिया करण्याची सुविधाही या कालावधीत उपलब्ध राहणार नाही. याचा परिणाम आधीच क्लेम दाखल केलेल्या सदस्यांवरही होणार आहे. अशा प्रकरणांची प्रक्रिया अपग्रेडेशनचे काम पूर्ण झाल्यानंतरच सुरू होईल. EPFO ने स्पष्ट केले आहे की, 29 जून 2026 पासून सर्व सेवा पुन्हा नियमितपणे सुरू केल्या जातील.

EPFO च्या सेवांचा वापर करणाऱ्या UMANG अॅप वापरकर्त्यांनाही काही दिवस प्रतीक्षा करावी लागू शकते. अॅपवरील माहितीनुसार, EPFO संबंधित सेवा 2 जुलै 2026 पर्यंत नियोजित देखभालीमुळे प्रभावित राहू शकतात. UMANG अॅपद्वारे सदस्य PF शिल्लक तपासणे, क्लेम दाखल करणे, UAN संबंधित सेवा वापरणे, तक्रार नोंदवणे आणि जीवन प्रमाणपत्रासाठी अर्ज करणे ही कामे करतात, मात्र ही सेवाही प्रभावित राहणार आहे.

EPFO पोर्टल किंवा अॅपच्या सेवा तात्पुरत्या बंद असल्या तरी सदस्य मिस्ड कॉल किंवा SMS द्वारे PF शिल्लक तपासू शकतात. यासाठी नोंदणीकृत मोबाईल क्रमांकावरून 011-22901406 या क्रमांकावर मिस्ड कॉल दिल्यास PF बॅलन्सची माहिती मिळू शकते. तसेच 7738299899 या क्रमांकावर EPFOHO UAN ENG असा SMS पाठवल्यास PF शिल्लक आणि अलीकडील योगदानाची माहिती मिळू शकते. मात्र, या सुविधांचा लाभ घेण्यासाठी UAN क्रमांक आधार, PAN आणि बँक खात्याशी लिंक असणे आवश्यक आहे.