► वृत्तसंस्था अयोध्या
अयोध्येतील राम मंदिर न्यायाचे महासचिव चंपत राय यांनी आपल्या पदाचा त्याग केला आहे. राम मंदिर दान अपहारप्रकरणी त्यांनी नैतिक उत्तरदायित्व स्वीकारून पदत्याग करीत असल्याचे स्पष्ट केले आहे. या अपहार प्रकरणात आतापर्यंत आठ आरोपींना अटक करण्यात आली आहे. त्यांच्यावर कारस्थान करणे आणि पैशाचा अपहार करणे, तसेच इतर अनेक आरोप ठेवण्यात आले असून आता न्यायालयात सर्व आरोपींवर न्यायालयात अभियोग चालविण्यात येईल.

चंपत राय यांच्यासमवेत न्यासाचे आणखी एक विश्वस्त अनिल मिश्रा यांनीही पदत्याग केला आहे. या दोन्ही पदाधिकाऱ्यांनी शुक्रवारी पदाचे त्यागपत्र रामजन्मभूमी तीर्थ क्षेत्र न्यासाला सादर केली. गुरुवारी या अपहार प्रकरणी 8 आरोपींना अटक करण्यात आली होती. अटक केलेल्यांमध्ये दानाची गणना करणारे कर्मचारी, दान गणना प्रमुख अधिकारी, दान गणनेच्या कामावर लक्ष ठेवणारा आणि सध्या निवृत्त असलेला बँकेचा अधिकारी, राम मंदिर न्यायाचे महासचिव चंपत राय यांचा कारचालक आणि त्यांचा नजीकचा साहाय्यक आणि इतरांचा समावेश आहे.

अटक करण्यात आलेल्यांना न्यायालयात हजर केल्यानंतर त्यांची रवानगी तुरुंगात करण्यात आली आहे. त्यांच्याकडून 79 लाख रुपये जप्त करण्यात आले असून त्यांच्याशी संबंधित एसबीआयचे पाच ते सहा कर्मचारीही यात सामील असल्याचे आतापर्यंतच्या तपासात आढळून आले आहे.

अपहार प्रकरणी एफआयआर
राम मंदिर दान प्रकरणी एफआयआर गुरुवारी सादर करण्यात आला आहे. आरोपींवर भारतीय न्याय संहितेच्या विविध अनुच्छेदांच्या अंतर्गत गुन्हे सादर करण्यात आले आहेत. यांच्यामध्ये अनुच्छेद 306, 316(5), 317(4), 317(5), 61 आणि 3(5) यांचा समावेश आहे. उत्तर प्रदेश प्रशासनाच्या सूचनेवरून ही कारवाई करण्यात आली असून कोणत्याही दोषीला सोडले जाणार नाही, असे उत्तर प्रदेशचे मुख्यमंत्री योगी आदित्यनाथ यांनी स्पष्ट केले आहे.
तीन सदस्यीय तज्ञ तपास पथक

या अपहार प्रकरणाचा तपास करण्यासाठी उत्तर प्रदेश सरकारने 14 जूनला एका तीन सदस्यीय विशेष अन्वेषण दलाची स्थापना केली होती. स्थापना दलाने आपला प्राथमिक अहवाल राज्य सरकारला सादर केल्यानंतर या अहवालातील सूचनांच्या अनुसार एफआयआर सादर करण्यात आला, अशी माहिती देण्यात आली आहे. न्यायालयीन कारवाईला लवकर प्रारंभ केला जाण्याची शक्यता आहे.

राजकीय पडसाद
राम मंदिर दान अपहार प्रकरणाचे राजकीय पडसादही उमटत आहेत. समाजवादी पक्षाने या प्रकरणाचे उत्तरदायित्व भारतीय जनता पक्षावर टाकले आहे. तसेच या प्रकरणात मुख्य सूत्रधारांना हात लावण्यात आलेला नाही, असा आरोप करण्यात आला आहे. मात्र, मुख्यमंत्री योगी आदित्यनाथ यांनी राज्य सरकारवरील सर्व आरोप फेटाळले असून विरोधी पक्ष या प्रकरणाचा राजकीय लाभ उठविण्याचा प्रयत्न करीत असल्याचा प्रत्यारोप केला आहे. ज्यांनी राम मंदिराच्या निर्माण कार्यालाच विरोध केला होता, ते आता या अपहार प्रकरणाचा लाभ उठविण्यासाठी उत्सुक आहेत, अशी टिप्पणी त्यांनी केली. या अपहार प्रकरणात दोषी असणाऱ्यांना कठोरातली कठोर शिक्षा लवकरात लवकर मिळवून दिली जाईल, असे आश्वासन त्यांनी देवरिया येथील एका जाहीर सभेत शुक्रवारी बोलताना दिले.

प्रकरण काय आहे…

रामभक्तांनी अयोध्येतील राम मंदिराला दिलेल्या देणग्या आणि दाने यांचा अपहार करण्यात आल्याचे हे प्रकरण आहे. दानपेटीत नोटांची गणना करताना त्या कमी मोजल्या गेल्या आहेत. तसेच राम मंदिराला देण्यात आलेले सुवर्णालंकार, सोने आणि चांदीच्या शीळा आणि इतर वस्तू काढून घेऊन त्यांच्यास्थानी बनावट वस्तू ठेवल्या गेल्या, असेही अन्वेषण दलाच्या प्राथमिक तपासात आढळले आहे. या अपहारात दाने, देणग्यांची गणना करणारे कर्मचारी, अधिकारी, तसेच त्यांच्यावर लक्ष ठेवणारे अधिकारी तसेच बँक अधिकाऱ्यांचा हात असल्याचा आरोप आहे.

अपहार कसा उघडकीस आला…
राम मंदिराला दिलेल्या देणग्या आणि दानांपैकी काही भागाचा अपहार करण्यात आला आहे, असे हिशेबाच्या तपासणीत आढळून आले होते. पावत्या आणि प्रत्यक्ष धन यांचा ताळमेळ जमत नव्हता. राम मंदिराच्याच काही विश्वस्तांनी यासंबंधी आक्षेप सादर केले होते. त्यानंतर न्यासाने या प्रकरणाच्या चौकशीची मागणी केली. उत्तर प्रदेश प्रशासनाने ती मान्य करून विशेष अन्वेषण दलाची स्थापना केली.