தமிழ்நாடு முதலமைச்சரும், தவெக தலைவருமான விஜய், இன்று சென்னை பனையூரில் உள்ள கட்சியின் தலைமை அலுவலகத்திற்குத் தூய தமிழ் மரபுப்படி பட்டு வேட்டி மற்றும் பட்டுச் சட்டை அணிந்து கம்பீரமாக வருகை தந்துள்ளார். எப்போதும் கோட்-சூட் அல்லது ஃபார்மல் உடைகளில் வலம் வரும் முதலமைச்சர் விஜய், இன்று முற்றிலும் மாறுபட்ட பாரம்பரிய உடையில் ‘மாஸ் என்ட்ரி’ கொடுத்துள்ளது தொண்டர்கள் மற்றும் அரசியல் வட்டாரத்தில் பெரும் வரவேற்பைப் பெற்றுள்ளது.
தமிழகத்தில் தவெக ஆட்சி அமைந்த பிறகு, உள்கட்சி நிர்வாகத்தை வலுப்படுத்தவும், பிற கட்சிகளில் இருந்து தவெக-வின் கொள்கைகளை ஏற்று வரும் முக்கியத் தலைவர்களை இணைக்கவும் இன்று பனையூர் தலைமை அலுவலகத்தில் ‘மாற்றுக் கட்சியினர் இணையும் பிரம்மாண்ட விழா’ ஏற்பாடு செய்யப்பட்டுள்ளது.
இன்று பிற்பகல் 3.50 மணியளவில் பனையூர் வளாகத்திற்குள் முதலமைச்சர் விஜய் தனது காரில் இருந்து இறங்கிய போது, அவரது தோற்றம் அனைவரையும் வியப்பில் ஆழ்த்தியது. வழக்கமான மேற்கத்திய உடைகளைத் தவிர்த்து, பட்டு வேட்டி, தங்கக் கரையுடன் கூடிய பட்டுச் சட்டை அணிந்து அவர் மேடை நோக்கிச் சென்றார்.
பட்டு வேட்டி சட்டையில் வந்த முதலமைச்சரைக் கண்டதும் அங்குத் திரண்டிருந்த ஆயிரக்கணக்கான தவெக தொண்டர்கள் மற்றும் மகளிர் அணியினர் "தமிழகத்தின் தலைமகன்" என முழக்கமிட்டு, மலர்களைத் தூவி உற்சாக வரவேற்பு அளித்தனர்.
அதிமுக மற்றும் திமுக உள்ளிட்ட முக்கியக் கட்சிகளின் மூத்த நிர்வாகிகள் சிலர் தவெக-வில் இணையப் போவதாகக் கடந்த சில நாட்களாக அரசியல் களம் சூடாக விவாதித்து வந்தது. நேற்று திமுக எம்.எல்.ஏ அனிதா ராதாகிருஷ்ணன் கைது மற்றும் ஜாமீன் விவகாரம், எடப்பாடி பழனிசாமியின் உள்கட்சி வேதனைப் பேச்சு எனத் தமிழக அரசியல் களம் பரபரப்பாக இருக்கும் வேளையில், இன்று பனையூரில் நடைபெறும் இந்த இணைப்பு விழா மிகவும் முக்கியத்துவம் வாய்ந்ததாகக் கருதப்படுகிறது.
முதலமைச்சர் விஜய் முன்னிலையில் தமிழகத்தின் பல்வேறு மாவட்டங்களைச் சேர்ந்த மாற்றுக்கட்சி முக்கியப் புள்ளிகள் தங்களை முறைப்படி தமிழக வெற்றிக் கழகத்தில் இணைத்துக் கொள்ளவுள்ளனர். இதற்கான சிறப்பு மேடை மற்றும் பாதுகாப்பு ஏற்பாடுகள் பனையூர் கிழக்கு கடற்கரைச் சாலை பகுதிகளில் பலத்த போலீஸ் பாதுகாப்புடன் செய்யப்பட்டுள்ளது குறிப்பிடத்தக்கது.
