या सामन्यात लक्ष्याचा पाठलाग करताना ऑस्ट्रेलियासाठी जॉर्जिया वॉल आणि बेथ मुनी सलामीला फलंदाजीसाठी उतरल्या होत्या. पण दुसऱ्याच षटकात जॉर्जिया वॉलला ९ धावांवर लॉरेन बेलने त्रिफळाचीत करत ऑस्ट्रेलियाला मोठा धक्का दिला होता. पण मुनीला युवा फोबी लिचफिल्डची साथ मिळाली.

या दोघींनी आक्रमक शॉट्स खेळण्यासोबतच एकेरी-दुहेरी धावा काढत धावफलक हलता ठेवला. त्यामुळे त्यांनी १०० धावांची शतकी भागीदारीही केली. या भागीदारीदरम्यान मुनीने अर्धशतक पूर्ण केले. लिचफिल्डही अर्धशतकाच्या जवळ होती. पण तिला १३ व्या षटकात चार्ली डीनने त्रिफळाचीत केले. लिचफिल्डने ३५ चेंडूत ६ चौकार आणि २ षटकारांसह ४८ धावा केल्या.

ती बाद झाल्यानंतरही मुनीने आपली लय कायम ठेवली. तिला एलिस पेरीने दुसऱ्या बाजूने साथ दिली. मात्र विजयासाठी केवळ ११ धावांची गरज असताना १६ व्या षटकात बेथ मुनीला सोफी इक्लेस्टोनने पायचीत केले. तिला आधी पंचांनी नाबाद दिले होते. पण डीआरएसमध्ये बराच वेळ तपासल्यानंतर ती बाद असल्याचे स्पष्ट झाले. त्यामुळे मुनी १० चौकारांसह ४९ चेंडूत ६४ धावा केल्या.

त्यानंतर १७ व्या षटकात एलिस पेरीला लिन्सी स्मिथने इक्लेस्टोनच्या हातून १२ धावांवर झेलबाद करण्याचा प्रयत्न केला. पण तिसऱ्या पंचांनी इक्लेस्टोनने झेल घेताना चेंडूचा स्पर्श जमिनीला लागल्याचे म्हटल्याने तिला नाबाद दिले. त्यानंतर पेरी आणि ऍश्ले गार्डरनने ऑस्ट्रेलियाला १८ व्या षटकात विजयापर्यंत पोहचवले. पेरी १३ धावांवर आणि गार्डनर ३ धावांवर नाबाद राहिली.