पनामा, व्हँकुव्हर येथील बीसी प्लेस मैदानावर झालेल्या अटीतटीच्या सामन्यात स्वित्झर्लंडने कोलंबियाचा पेनल्टी शूटआऊटमध्ये ४-३ असा पराभव करत इतिहास रचला. या थरारक विजयासह स्वित्झर्लंडने तब्बल ७२ वर्षांचा प्रदीर्घ प्रतीक्षा संपवून पहिल्यांदाच फिफा विश्वचषक २०२६ च्या उपांत्यपूर्व फेरीत धडक मारली आहे. स्वित्झर्लंडने यापूर्वी १९५४ मध्ये अंतिम आठ संघात स्थान मिळवले होते.

निर्धारित ९० मिनिटे आणि त्यानंतरच्या अतिरिक्त ३० मिनिटांच्या खेळात दोन्ही संघांना एकही गोल करता आला नाही. सामन्यात कोलंबियाने आक्रमक खेळ केला, परंतु स्वित्झर्लंडचा गोलरक्षक ग्रेगोर कोबेलने अप्रतिम कामगिरी करत कोलंबियाचे सर्व प्रयत्न हाणून पाडले. सामन्याच्या २१ व्या मिनिटाला गुस्ताव्हो पुएर्ताचा उत्कृष्ट फटका कोबेलने हवेत सूर मारत अडवला.

सामना गोलशून्य बरोबरीत सुटल्याने निकाल पेनल्टी शूटआऊटद्वारे लावण्यात आला. कोलंबियाच्या डेव्हिन्सन सांचेझचा शॉट गोलपोस्टच्या वरच्या पट्टीला लागून परतला, तर चुचो हर्नांडेझचा शॉट गोलरक्षक कोबेलने उत्कृष्टपणे अडवला. स्वित्झर्लंडच्या मॅन्युएल अकांजीचा शॉट चुकला असला, तरी रुबेन व्हर्गासने शांत डोक्याने शेवटचा आणि निर्णायक गोल करत स्वित्झर्लंडच्या विजयावर शिक्कामोर्तब केले.

आता अर्जेंटिनाशी सामना

या ऐतिहासिक विजयासह स्वित्झर्लंडने गेल्या चार विश्वचषकांमधील (२००६, २०१४, २०१८, २०२२) उप-उपांत्यपूर्व फेरीचे ग्रहण शेवटी सोडवले आहे. तसेच त्यांचा स्पर्धात्मक सामन्यांमधील सलग ११ सामन्यांचा अपराजित राहण्याचा विक्रमही कायम आहे. आता उपांत्यपूर्व फेरीत स्वित्झर्लंडचा सामना गतविजेत्या लिओनेल मेस्सीच्या अर्जेंटिना संघाविरुद्ध होणार आहे.