पोलीस हे कायद्याचे रक्षक असतात, असच आपण सर्वांनी आजपर्यत ऐकलंय, पण याच रक्षकांनी कायदा तोडायचं ठरवलं तर..? कायदा पाळण्याची, रक्षणाची जबाबदारी असणाऱ्या पोलिस कर्मचाऱ्यानेच कायदा पायदळी तुडवल्याचा अत्यंत संतपाजनक आणि तितकाच धक्कादायक प्रकार घडल्याचे समोर आले आहे. पहिली पत्नी हयात असताना, आणि तिच्याशी घटस्फोट झालेला नसतानाही, हिंगोली जिल्ह्यातील वसमत शहरात एका पोलीसाने दुसरं लग्न करण्याचा घाट घातल्याचं उघड झालं आहे. एवढंच नव्हे नवऱ्याच्या होणाऱ्या लग्नाबाबत समजल्यावर त्याची पत्नी त्याला थांबवण्यासाठी आणि जाब विचारण्यासाठी आली तेव्हा. याच पोलीसाने तिला सर्वांसमोर अमानुष मारहाण केली. या भयानक घटनेचे काही क्षण व्हिडीओत कैद झाले असून त्यामध्यो तो पोलीस कर्मचारी पत्नीला बेदम मारताना दिसतोय, मात्र तिथे उभ्या असलेल्या लोकांनी फक्त बघ्याची भूमिका घेतली. हा व्हिडीओ प्रचंड व्हायरल झाला आहे. यामुळे संतापाची प्रचंड लाट उसळली असून वसमत शहर पोलीसांत गुन्हा दाखल करण्यात आला आहे.
काय आहे प्रकरण?
मिळालेल्या माहितीनुसार, प्रशांत गजभारे असे आरोपी पतीचं नाव असून तो नांदेड पोलीस दलात कार्यरत असल्याचा दावा पहिल्या पत्नीने केला. पत्नीच्या म्हणण्यानुसार, प्रशांत गजभारे यांनी घरी “ड्युटीवर जात आहे” असे सांगितलं आणि त्यानंतर थेट दुसरं लग्न केलं.
वसमत शहरातील कृष्णा मंगल कार्यालय परिसरात हा प्रकार घडला. पतीचे दुसरे लग्न सुरू असल्याची माहिती मिळाल्यानंतर पहिली पत्नी तेथे पोहोचली. आपला घटस्फोट वगैरे काहीही झालेला नाही, तरी तू दुसरं लग्न का करतो असा जाब तिने पतीला विचारला. मात्र ते ऐकून तिचा पती, पोलीस कर्मचारी प्रशात भडकला आणि त्याने आजूबाजूची लोक, परिस्थिती काहीच न बघता पत्नीला मारहाण करण्यास सुरूवात केली. तसेच नवरदेव पती प्रशांतसह काही नातेवाईकांनी आपल्याला मारहाण केला, असा आरोप महिलेने केला आहे.
या घटनेचे व्हिडिओ सोशल मीडियावर मोठ्या प्रमाणात प्रसारित झाले आहेत. प्रकरणाची चौकशी वसमत शहर पोलीस करत असून, संबंधित आरोपींविरोधात कायदेशीर कारवाई सुरू करण्यात आली आहे.
