MSRTC Fare Hike : एसटीने प्रवास करणाऱ्या प्रवाशांसाठी एक महत्त्वाची बातमी समोर आली आहे. महाराष्ट्र राज्य मार्ग परिवहन महामंडळाने (ST Mahamandal Maharashtra) साध्या बससेवा प्रकारासाठी लागू असलेली 10 टक्के परिवर्तनशील (हंगामी) भाडेवाढ येत्या 31 जुलैपर्यंत कायम ठेवण्याचा निर्णय घेतला आहे. गेल्या काही कालावधीत डिझेलच्या दरात सातत्याने वाढ होत असल्याने महामंडळावर मोठा आर्थिक भार पडत आहे, हाच वाढता खर्च लक्षात घेऊन एसटी प्रशासनाने हा निर्णय घेतला आहे.
एसटी महामंडळ ही ग्रामीण महाराष्ट्राची जीवनवाहिनी मानली जाते. दररोज लाखो प्रवासी या लालपरीने प्रवास करतात. मात्र, डिझेलच्या वाढत्या किमतींमुळे महामंडळाचा दैनंदिन इंधन खर्च कमालीचा वाढला असून त्याचा थेट फटका एसटीच्या आर्थिक स्थितीवर होत आहे. अशा बिकट परिस्थितीत प्रवाशांना अखंडित आणि दर्जेदार सेवा देण्यासाठी ही भाडेवाढ कायम ठेवणे भाग पडल्याचे महामंडळाकडून स्पष्ट करण्यात आले आहे.
महामंडळाने यापूर्वी उन्हाळी गर्दीचा हंगाम लक्षात घेऊन साध्या बसगाड्यांच्या तिकिट दरात तात्पुरती 10 टक्के वाढ लागू केली होती. या भाडेवाढीची मुदत 15 जुलै 2026 रोजी रात्री 11 वाजेपर्यंत संपणार होती. तथापि, सध्याची वाहतूक गरज, वाढती प्रवासी संख्या आणि इंधनाचा वाढलेला खर्च विचारात घेऊन या तात्पुरत्या भाडेवाढीस मुदतवाढ देण्याचा निर्णय घेण्यात आला आहे.
गेल्या काही महिन्यांत डिझेलच्या दरात झालेल्या वाढीमुळे महामंडळाच्या तिजोरीवर मोठा ताण पडत असल्याचं चित्र आहे. त्यामुळे ही दरवाढ कायम ठेवण्यात आली आहे. एसटी महामंडळाचे उद्दिष्ट प्रवाशांना सुरक्षित, नियमित आणि दर्जेदार सेवा देणे हेच आहे. मात्र, इंधन खर्चाचा हा वाढता ताण काही प्रमाणात कमी करण्यासाठी आणि एसटी सेवा विस्कळीत न होऊ देण्यासाठी प्रशासनाने प्रवाशांना सहकार्य करण्याचे आवाहन केले आहे.
एसटी महामंडळाने घेतलेल्या या नव्या निर्णयानुसार, आता 31 जुलै 2026 रोजी रात्री 11 वाजेपर्यंत साध्या बससेवा प्रकारासाठी 10 टक्के परिवर्तनशील भाडेवाढ लागू राहणार आहे. यामुळे पुढील काही दिवस प्रवाशांना साध्या एसटी बसने प्रवास करताना वाढीव दरानेच तिकीट खरेदी करावे लागणार आहे.
ही बातमी वाचा:
