धकाधकीच्या लाईफस्टाईलमुळे घर स्वच्छ ठेवणं अनेकांसाठी मोठं आव्हान बनलं आहे. ऑफिस, घर, मुलं आणि इतर जबाबदाऱ्यांमध्ये दिवस कधी संपतो हेच कळत नाही. त्यामुळे घराची साफसफाई अनेकदा पुढे ढकलली जाते आणि पसारा वाढत जातो. अशा वेळी सोशल मीडियावर एक सोपी आणि प्रभावी पद्धत चर्चेत आली आहे. ती म्हणजे ‘5-5-5 रूल’.

या पद्धतीमध्ये तासन्‌तास साफसफाई करण्याची गरज नसते. दिवसातून फक्त 15 मिनिटे दिली तरी घर हळूहळू नीटनेटके राहू शकते. त्यामुळे ही पद्धत काम करणाऱ्या महिला, विद्यार्थी, एकटे राहणारे तरुण आणि व्यस्त कुटुंबांमध्ये लोकप्रिय होत आहे.

काय आहे ‘5-5-5 रूल’?
या पद्धतीत साफसफाईचे काम तीन छोट्या टप्प्यांमध्ये विभागले जाते. प्रत्येक टप्प्यासाठी फक्त 5 मिनिटे द्यायची असतात.

1. पहिले 5 मिनिटे – पसारा आवरा
घरात इकडे-तिकडे पडलेल्या वस्तू त्यांच्या जागेवर ठेवा. सोफ्यावरचे कपडे, टेबलवरील कागद, खेळणी किंवा वापरून ठेवलेली भांडी जागेवर ठेवण्यापासून सुरुवात करा.

2. पुढची 5 मिनिटे – स्वच्छता करा
ज्या भागाचा सर्वाधिक वापर होतो त्या भागाची झटपट स्वच्छता करा. उदाहरणार्थ, किचनचा ओटा, डायनिंग टेबल, बाथरूमचा सिंक किंवा हॉलमधील सेंटर टेबल स्वच्छ पुसा.

3. शेवटची 5 मिनिटे – उद्याची तयारी
दुसऱ्या दिवसासाठी आवश्यक असलेल्या छोट्या गोष्टी आधीच तयार ठेवा. पाण्याच्या बाटल्या भरून ठेवा, डबा किंवा कपडे तयार ठेवा किंवा आवश्यक वस्तू एका ठिकाणी ठेवा.

ही पद्धत प्रभावी का?
मोठं काम पाहिलं की अनेकदा ते पुढे ढकललं जातं. पण 5 मिनिटांचं काम सुरू करणं मानसिकदृष्ट्या खूप सोपं असतं. त्यामुळे साफसफाईचा ताण कमी होतो आणि दररोज थोडंसं काम केल्यामुळे घर सतत स्वच्छ राहण्यास मदत होते.

5-5-5 रूल फॉलो करण्यासाठी टिप्स:
– दररोज एकाच वेळी 15 मिनिटांचा वेळ ठरवा.
– मोबाईलवर 5 मिनिटांचा टाइमर लावा.
– संपूर्ण घर एकाच दिवशी साफ करण्याचा प्रयत्न करू नका.
– कुटुंबातील प्रत्येक सदस्याला एक छोटी जबाबदारी द्या.
– आठवड्यातून एक दिवस सखोल साफसफाईसाठी राखून ठेवा.