வாஷிங்டனுக்கும் டெஹ்ரானுக்கும் இடையே பேச்சுவார்த்தைகள் நடைபெற்று வருவதாகவும், ஒரு உடன்பாடு எட்டப்படுவதற்கு நல்ல வாய்ப்பு இருப்பதாகவும் அமெரிக்க அதிபர் டொனல்ட் ட்ரம்ப் நேற்று தெரிவித்தார். ஆனால், பேச்சுவார்த்தைகள் தோல்வியுற்றால், ஈரான் மீதான அமெரிக்க ராணுவத் தாக்குதல்களை மீண்டும் தொடங்கும் என்றும் அவர் எச்சரித்துள்ளார்.
செய்தியாளர்களிடம் பேசிய ட்ரம்ப், "நாங்கள் நல்ல பேச்சுவார்த்தைகளை நடத்தி வருகிறோம். ஏதேனும் ஒரு நல்ல விஷயம் நடப்பதற்கு வாய்ப்புள்ளது என்று நான் நினைக்கிறேன். அப்படி நடக்கவில்லை என்றால், இரண்டு நாட்களுக்கு முன்பு நாங்கள் என்ன செய்து கொண்டிருந்தோமோ அதையே செய்வோம்" என்று கூறினார். பின்னர், மிச்சிகனில் நடந்த ஒரு தேர்தல் பிரசாரக் கூட்டத்தில் பேசிய அவர், ஈரானுக்கு லஞ்சம் கொடுக்க முடியாது என்றும், ராஜதந்திரம் பலனளிக்கவில்லை என்றால், அமெரிக்கா அவர்களை முழுமையாக தோற்கடிக்கும் என்றும் ட்ரம்ப் எச்சரிக்கை விடுத்தார்.
திங்களன்று சவூதி அரேபியா, ஜோர்டான் மற்றும் ஈராக் ஆகிய நாடுகளில் ஆளில்லா விமானத் தாக்குதல்கள் நடந்ததாக வெளியான செய்திகளுக்கு மத்தியில் இந்த அறிக்கைகள் வந்துள்ளன. ஈரானுக்கு எதிரான தனது இரண்டு வார கால குண்டுவீச்சுத் தாக்குதலை அமெரிக்கா சனிக்கிழமையன்று நிறுத்தி வைத்தது. ஒரு அமெரிக்க அதிகாரி மற்றும் பல அமெரிக்க ஊடக அறிக்கைகளின்படி, இந்தத் தாக்குதல்கள் தங்களால் இயன்ற அனைத்தையும் சாதித்துவிட்டதாக ராணுவத் தளபதிகள் ட்ரம்பிடம் தெரிவித்துள்ளனர்.
ஈரான் மீதான வான்வழித் தாக்குதல்களில் பயன்படுத்தப்படும் வெடிமருந்துகளின் பற்றாக்குறை குறித்து, கூட்டுப் படை தலைமைத் தலைவர் ஜெனரல் டான் கெய்னும் கவலை தெரிவித்ததாக ஒரு அமெரிக்க அதிகாரி ராய்ட்டர்ஸிடம் கூறியுள்ளார். அமெரிக்க ராணுவம் வெடிமருந்து பற்றாக்குறையை எதிர்கொள்வதாக வந்த செய்திகளை ட்ரம்ப் நிராகரித்தார் . கையிருப்புகள் விரைவாக நிரப்பப்பட்டு வருவதாகவும், மேலும், மேம்பட்ட ஆயுத அமைப்புகளை விரும்புவதாகவும் அவர் கூறினார்.
இதனிடையே, டெஹ்ரான் ராஜதந்திர முயற்சிகளைக் கைவிடவில்லை என்றும், மத்தியஸ்தர்கள் மூலம் பேச்சுவார்த்தைகள் இன்னும் நடைபெற்று வருவதாகவும், ஈரானின் வெளியுறவு அமைச்சக செய்தித் தொடர்பாளர் இஸ்மாயில் பாகாயி கூறியுள்ளார்.
இருப்பினும், பேச்சுவார்த்தைக்கு ஈரான் வேண்டுகோள் விடுத்ததாக வந்த செய்திகளை அவர் நிராகரித்தார். "இது எங்கள் இயல்பில் இல்லை" என்று பாகாயி கூறினார். ட்ரம்ப் தானாகவே விதித்துக்கொண்ட போர்நிறுத்தம் அமலில் இருக்கும் வரை, ஈரான் தாக்குதல்களைத் தொடங்காது என்று ஒரு மூத்த ஈரானிய அதிகாரி ராய்ட்டர்ஸிடம் தெரிவித்துள்ளார்.
ஈரான் பேச்சுவார்த்தைக்கு அழைத்ததாக ட்ரம்ப் கூறுவது இது முதல் முறை அல்ல. ஈரான் அதை மறுப்பதும் இது முதல் முறை அல்ல. ஆனாலும், அமெரிக்க அதிபர் விடுவதாக இல்லை. ஒவ்வொரு முறையும், தங்கள் ராணுவ தளவாடங்களை நிரப்புவதற்கு தேவையான அவகாசத்தை பெறவே, ட்ரம்ப் இந்த யுக்தியை பயன்படுத்தி வருவது நன்றாகவே தெரிவதாக நிபுணர்கள் கூறுகின்றனர்.
