राज्यात जोरदार पाऊस सुरू आहे. त्यामध्येच भारतीय हवामान विभागाच्या अंदाजानुसार, राज्यात पावसाचा जोर अधिक वाढेल. मराठवाडा, विदर्भ आणि कोकण घाटमाथ्यावर पावसाचा ऑरेंज अलर्ट जारी करण्यात आला. राज्यातील जवळपास जिल्ह्यांमध्ये विजांच्या कडकडाटासह पावसाचा येलो अलर्ट जारी करण्यात आला. पुणे घाटमाथा, सातारा, रायगड, जळगाव, कोल्हापूर, वर्धा, अमरावती, नागपूर, भंडारा, गोदिंया, चंद्रपूर, गडचिरोली, धुळे, नशिक, ठाणे, मुंबई, रत्नागिरी, धुळे, बीड, परभणी, हिंगोली या जिल्ह्यात मुसळधार पावसाचा इशारा दिला. छत्तीसगड आणि ओडिसा परिसरात वादळी प्रणाली सक्रिय आहे. ओडिसाच्या संभळपूरपासून 80 किलोमीटर वायव्येकडे डप डिप्रेशन सक्रिय आहे. राज्यात पुढील काही तासात पावसाचा जोर अधिक वाढण्याची शक्यता आहे. राज्यात सध्या सर्वदूर पाऊस कोसळताना दिसत आहे. त्यामध्येच आजही भारतीय हवामान विभागाने मोठा इशारा दिला.

या पावसामुळे शेतकऱ्यांना मोठा दिलासा मिळाला. जून महिन्यात पाऊस कमी झाला. जवळपास जून महिना कोरडा गेला. पण जुलै महिन्यात त्याची पूर्ण भरपाई भरून निघाली. नांदेड शहरासह काही भागात सकाळपासूनच मुसळधार पावसाला सुरुवात झालीय. या पावसाळ्यातील हा सगळ्यात मोठा पाऊस आहे. हा पाऊस पिकांना वरदान ठरणार आहे. या पावसामुळे पहिल्यांदाच खळखळून भरून नाल्या वाहणार आहेत.

जलसाठे भरण्यासाठी नांदेड जिल्ह्यात आणखीन मोठ्या पावसाची गरज आहे. या पावसामुळे सर्वत्र गारवा पडला. हवामान विभागाने गोंदिया जिल्ह्यासाठी रेड अलर्ट जारी केला. दिवसभर अपेक्षित पाऊस न झाल्याने नागरिक आणि शेतकऱ्यांमध्ये चिंता होती. मात्र, रात्री विजांच्या कडकडाटासह जोरदार पावसाने दमदार हजेरी लावली. या पावसामुळे धानासह खरीप पिकांना मोठा दिलासा मिळाला.

शेतकऱ्यांमध्ये आनंदाचे वातावरण आहे. जिल्ह्यात पुढील काही दिवस पावसाचा जोर कायम राहण्याचा अंदाज आहे. प्रशांत महासागरात एल निनो सक्रिय आहे. एल निनोमुळे मॉन्सूनला फटका बसणार असल्याचे सांगितले जात होते. जून महिना कोरडा गेल्याने टेन्शन अधिकच वाढले. त्यानंतर कुठे जुलै महिन्याच्या पहिल्याच दिवसापासून मुसळधार पावसाला सुरूवात झाली.