मराठा आरक्षण आंदोलक मनोज जरांगे पाटील मुंबईतील आझाद मैदानावर आंदोलन करण्याच्या आपल्या भूमिकेवर ठाम आहेत. मुंबई पोलिसांनी त्यांना दोनदा आंदोलनाची परवानगी नाकारली असली तरी, जरांगे यांनी उद्या, १५ सप्टेंबर रोजी सकाळी ११ वाजता अंतरवालीतून मुंबईच्या दिशेने निघण्याचा निर्धार व्यक्त केला आहे. ते १९ सप्टेंबर रोजी मुंबईत पोहोचतील आणि आझाद मैदानावर उपोषण सुरू करणार आहेत.

राज्य सरकारने गणेशोत्सवाचे कारण देत आणि कायदा व सुव्यवस्थेचा प्रश्न उपस्थित करत जरांगे यांना परवानगी नाकारली आहे. मुख्यमंत्री एकनाथ शिंदे यांनी जरांगे यांना आंदोलनाचा फेरविचार करण्याची विनंती केली आहे, तसेच गणेश दर्शनासाठी येण्याचे आवाहन केले आहे. जरांगे यांनी मात्र, आझाद मैदानावर एकट्याने आंदोलनाची परवानगी मिळावी यासाठी पुन्हा अर्ज केल्याची माहिती गंगाधर काळकुटे यांनी दिली आहे. त्यांनी अंतरवालीतील व्यासपीठाप्रमाणेच मुंबईतही उपोषण करण्याची तयारी दर्शवली आहे.