On This Day in Cricket: आंतरराष्ट्रीय टी२० क्रिकेटमध्ये गोलंदाजीत एक नवी ओळख निर्माण करणारा खेळाडू म्हणजे राशिद खान. राशिदने टी२० क्रिकेटमध्ये आत्तापर्यंत शानदार कामगिरी केली आहे. राशिद शुक्रवारी (२० सप्टेंबर) त्याचा २६ वा वाढदिवस साजरा करत आहे.

अफगाणिस्तानमध्ये २० सप्टेंबर १९९८ मध्ये जन्मलेला राशिद लहानपणी आभ्यासातही हुशार होता. त्याला डॉक्टरही बनायचे होते. पण क्रिकेटची आवड त्याला मैदानापर्यंत घेऊन आली. त्याने लहानवयातच क्रिकेटमध्ये मोठी प्रगती केली.

अवघ्या १७ व्या वर्षी त्याने अफगाणिस्तानसाठी वनडे पदार्पण केले. राशिदने त्याच्या कारकिर्दीत सुरुवातीपासूनच त्याच्या गोलंदाजीत किती प्रतिभा आहे, हे सिद्ध केलं. त्याला त्याची जागा बनवायला फार वेळ लागला नाही.

त्याच्या लेगस्पिनने तो टी२० क्रिकेटमधील एक दिग्गज खेळाडू ठरला. चेंडू तो फार वळवत नाही, पण हवेबरोबर तो त्याच्या चेंडूला जी गती देतो, त्याचा फायदा त्याला मिळतो. गुगली हे त्याचं सर्वात मोठं शस्त्र आहे.

त्याचबरोबर त्याच्याकडे गोलंदाजीतील विविधताही आहे. इतकेच नाही, तर तो बऱ्याचदा संघाला गरज पडेल तेव्हा आक्रमक फलंदाजीही करू शकतो. त्याच्या प्रभावी गोलंदाजीमुळे त्याला करामती खान टोपननावही पडलं आहे.

त्याच्या नावावर अनेक विक्रमही आहे. त्याने खेळलेल्या मोठ्या टी२० लीगमध्ये हॅट्रिक घेण्याचाही कारनामा केला आहे. त्याने २०१९ मध्ये आयर्लंडविरुद्ध आंतरराष्ट्रीय टी२० क्रिकेटमध्ये ४ चेंडूत सलग ४ विकेट्स घेतल्या होत्या. त्यावेळी असा कारनामा करणारा तो मलिंगानंतरचा दुसराच खेळाडू होता.

इतकेच नाही, तर त्याने आयपीएल २०२३ मध्ये गुजरात टायटन्सकडून खेळताना कोलकाता नाईट रायडर्सविरुद्ध हॅट्रिक घेतली होती. त्यावेळी त्याने आंद्रे रसेल, सुनील नारायण आणि शार्दुल ठाकूर यांना सलग तीन चेंडूवर बाद केले होते.

त्याने २०१७ साली कॅरेबियन प्रीमियर लीग स्पर्धेतही गयाना ऍमेझॉन वॉरियर्ससाठी हॅट्रिक घेतली होती. त्याच्यानावावर बीबीएलमध्ये खेळतानाही हॅट्रिक आहे. त्याने २०२० मध्ये ऍडलेड स्ट्रायकर्ससाठी सिडनी सिक्सर्सविरुद्ध हॅट्रिक घेतली होती. एकूणच राशिदने त्याची हॅट्रिक ही केवळ योगायोग नाही, तर त्याची प्रतिभा असल्याचे वेळोवेळी सिद्ध केले आहे.