IPL 2025 Mega Auction Date And Venue: इंडियन प्रीमियर लीग 2025 चा मेगा लिलाव कधी होणार याबाबत चाहत्यांमध्ये प्रचंड उत्सुकत आहे. कारण यावेळी अनेक दिग्गज खेळाडू लिलावात येण्याची शक्यता आहे. त्यामुळे अनेक खेळाडूंचा संघ बदलण्याची शक्यता आहे. अशा परिस्थितीत आता लिलवाची तारीख आणि ठिकाण देखील समोर आले आहे. मीडिया रिपोर्ट्नुसार आगामी हंगामापूर्वी होणारा मेगा लिलाव 24 आणि 25 नोव्हेंबर रोजी होण्याची शक्यता आहे, तसेच यासाठी ठिकाणही निश्चित करण्यात आले आहे. यावेळी सौदी अरेबियाची राजधानी रियाधमध्ये आयपीएल मेगा लिलाव आयोजित केला जाण्याची शक्यता आहे.

आयपीएलचा शेवटचा लिलाव दुबईत पार पडला. पण यावेळी रियादची निवड होऊ शकते. भारतीय क्रिकेट नियामक मंडळाकडून याबाबत अद्याप कोणतीही अधिकृत घोषणा करण्यात आलेली नाही. परंतु हे ठिकाण निश्चित मानले जात आहे. आयपीएल 2025 च्या मेगा लिलावासाठी लंडन आणि सिंगापूर या शहरांचा देखील विचार केला जात होता. स्टारस्पोर्टने दिलेल्या वृत्तानुसार लिलावासाठी रियादची निवड करण्यात आली आहे. भारताप्रमाणे रियाधचा टाइम झोन योग्य मानला जातो. यासोबतच प्रसारणाच्या बाबतीतही सुलभता येईल.

कार्यक्रमस्थळाची तयारी अंतिम टप्प्यात
समोर आलेल्या माहितीनुसार कार्यक्रमस्थळाची तयारी अंतिम टप्प्यात सुरू आहे. लिलावाचे ठिकाण पूर्णपणे तयार केले जात आहे. सर्व 10 फ्रँचायझींशी संबंधित अधिकारी लिलावासाठी रियाधला पोहोचतील आणि त्यांच्यासोबत जिओ आणि डिस्ने स्टार्सची एक मोठी टीमही जाणार आहे. लिलाव जिओ आणि स्टारवर नेटवर्कवर थेट प्रसारित केला जाणार आहे. दरम्यान मेगा लिलावापूर्वी सर्व संघांना आपल्या राखून ठेवलेल्या आणि सोडलेल्या खेळाडूंची यादी देखील शेअर करावी लागणार आहे. यासाठी 31 ऑक्टोबरची मुदत देण्यात आली आहे.




31 ऑक्टोबरपूर्वी रिटेन्शची यादी येणार
आयपीएलमधील सर्व संघांना 31 ऑक्टोबरपूर्वी कायम ठेवलेल्या खेळाडूंची यादी जाहीर करायची आहे. ही यादी सर्व संघ बीसीसीआयकडे सादर करणार आहेत. यानंतर लिलाव पार पडणार आहे. यावेळी अनेक मोठ्या खेळाडूंचे संघ बदलू शकतात. सोशल मीडियावर रोहित शर्माच्या नावाची खूप चर्चा सुरू आहे. गेल्या मोसमात मुंबई इंडियन्सने रोहितला कर्णधारपदावरून हटवले होते. परंतु इंडियन एक्स्प्रेसच्या बातमीनुसार मुंबई रोहितला रिटेन करू शकते. मुंबई इंडियन्स रोहितसोबतच सूर्यकुमार यादव, हार्दिक पांड्या आणि जसप्रीत बुमराह या खेळाडूंना कायम ठेवू शकते. 31 ऑक्टोबरपर्यंत हे चित्र स्पष्ट होणार आहे.