‘सिकंदर’ हा सलमान खानचा मोस्ट अवेटेड चित्रपट आहे, ज्याची त्याचे चाहते आतुरतेने वाट पाहत आहेत. या चित्रपटावर बऱ्याच दिवसांपासून काम सुरू आहे. सध्या बातम्या येत आहेत की, सलमानला मिळणाऱ्या धमक्यांमुळे त्याचे शूटिंग काही काळासाठी थांबवण्यात आले आहे. सलमानच्या जवळचे बाबा सिद्दिकी यांच्यावर 12 ऑक्टोबरला मुंबईत गोळ्या झाडण्यात आल्या, त्यानंतर त्यांचा मृत्यू झाला. यानंतर लॉरेन्स बिश्नोई टोळीने जबाबदारी स्वीकारली आणि सलमानलाही जीवे मारण्याची धमकी देण्यात आली.
सलमानला धमक्या मिळाल्यानंतर शो आणि त्याच्या चित्रपटाच्या शूटिंगवर प्रश्न उपस्थित करण्यात आले होते, मात्र त्यावेळी सलमानची सुरक्षा वाढवण्यात आल्याचे सांगण्यात आले होते. यासोबतच शूटिंगच्या वेळापत्रकावर थोडा परिणाम होईल, पण शूटिंग थांबणार नाही, असेही सांगण्यात आले. मात्र आता सलमानला पुरेशी सुरक्षा दिली जाणार नसल्याचा खुलासा त्याच्या मित्राने केला आहे. पुढील काही दिवस सलमान कुठलेही शूट करणार नाही.
मात्र, सर्वात मोठा प्रश्न ‘सिकंदर’च्या रिलीजचा आहे. वास्तविक, ‘सिकंदर’ हा चित्रपट 2025 च्या ईदला प्रदर्शित होणार होता, परंतु ज्या प्रकारे चित्रपटाचे शूटिंग थांबवण्याच्या बातम्या येत आहेत, त्यामुळे रिलीजच्या तारखेतही फरक पडेल, असा अंदाज वर्तवला जात आहे. यापूर्वी ‘सिकंदर’चे शूटिंग नोव्हेंबर किंवा डिसेंबरपर्यंत पूर्ण होईल, असे सांगितले जात होते. रिलीजबाबत सलमानच्या मित्राने सांगितले की, अजून काही सांगता येणार नाही. ‘सिकंदर’ हा एक असा चित्रपट आहे, ज्यामध्ये भरपूर कोरिओग्राफ केलेले ॲक्शन सीन आहेत, ज्यासाठी चित्रपटाचे दिग्दर्शक मुरुगादास यांना सलमानकडून आणखी वेळ हवा होता, परंतु आता ते कठीण होत आहे.
सलमानच्या जवळच्या व्यक्तीने सांगितले की, भविष्यासाठी काहीही स्पष्ट नाही, कारण सध्या सर्वात महत्त्वाची गोष्ट सलमान आणि त्याच्या कुटुंबाची सुरक्षा आहे. या परिस्थितीशी तडजोड करता येणार नाही. सलमानला धमकी दिल्यानंतर त्याला वाय-प्लस सुरक्षा देण्यात आली आहे. सलमानच्या चित्रपटाबद्दल बोलायचे झाले तर, यात सत्यराज, प्रतीक बब्बर, रश्मिका मंदान्ना यांच्यासह अनेक बड्या स्टार्सची नावे आहेत.