வெங்கி அட்லூரி இயக்கத்தில் துல்கர் சல்மான், மீனாட்சி சௌத்ரி, ராம்கி நடிப்பில், ஜீவி பிரகாஷ்குமார் இசையில் உருவாகி உள்ள திரைப்படம் 'லக்கி பாஸ்கர்'.

இப்படம் தீபாவளி பண்டிகையை முன்னிட்டு வரும் அக்டோபர் 31ஆம் தேதி வெளியாக இருக்கிறது. இந்நிலையில் படத்தின் புரொமோஷன் பணிகளில் படக்குழுவினர் ஈடுபட்டு வருகின்றனர். அவ்வகையில் நேற்று (அக்டோபர் 23) சென்னையில் நிகழ்ச்சி ஒன்று நடைபெற்றது. அந்நிகழ்ச்சியில் பேசிய துல்கர் சல்மான், "நீண்ட நாட்களுக்குப் பிறகு என்னுடைய படம் திரைக்கு வருகிறது. இந்த படத்தில் வரும் பாஸ்கர் கதாபாத்திரம் அனைவரின் வாழ்க்கையிலும் பொருந்தும்.

நான்கு மொழிகளிலும் டப்பிங் செய்வதற்கு 40 நாள் ஆகும். ஒவ்வொரு மொழிக்கும் 10 நாட்கள் எடுக்கும், 40 நாட்களும் இருட்டில் அமர்ந்தே பேசினேன். அது நான்கு முறை நடித்தது போன்ற ஒரு அனுபவத்தை எனக்குக் கொடுத்தது. டிரைலரில் வருவது என்னுடைய குரல் இல்லை. ஆனால் படம் வெளியாகும் போது படத்தில் என்னுடைய குரல்தான் இருக்கும் அதற்கு நான் கேரன்டி.

நான் ரசித்த பிடித்த நடிகர்கள் உடன் நடிப்பது எனக்குப் பாக்கியம். அப்படி ஒருவர்தான் ராம்கி. அவருடைய ஹேர் ஸ்டைலுக்கு நான் மிகப் பெரிய ரசிகன். தற்போது நீண்ட இடைவெளிக்குப் பிறகு 'காந்தா' என்ற நேரடி தமிழ்ப் படத்தில் நடித்து வருகிறேன். இதுவும் ஒரு பீரியட் திரைப்படம்தான். இப்படத்தில் நடித்திருக்கும் மீனாட்சி சௌவுத்ரி இரவு ஒரு படம், காலையில் ஒரு படம் என்று நடித்து வருகிறார். அதனால் இங்கு வர முடியவில்லை. ஒரு நடிகனாக எனக்கு இதைப் புரிந்துகொள்ள முடிகிறது" என்று கூறியிருக்கிறார்.

"இந்த படத்திற்கு 'லக்கி பாஸ்கர்' என்ற பெயர் வைத்துள்ளீர்கள், உங்கள் வாழ்க்கையில் லக்கி என்றால் எதைக் கூறுவீர்கள்" என்ற கேள்விக்கு, "என் வாழ்க்கையில் நான் லக்கிதான், பிறந்த வீடும் லக்கிதான் என்றிருக்கிறார். மேலும் நான் நடிகர் அஜித்குமாரின் மிகப் பெரிய ரசிகன். அவரை நான் மதிக்கிறேன் அவர் போல் யாரும் இருக்க முடியாது." என்று தெரிவித்திருக்கிறார்.

மேலும், "அக்டோபர் 31ம் தேதி வெளியாகும் அமரன், பிரதர், பிளடி பெக்கர் ஆகிய படங்களும் வருகிறது. அனைத்து படங்களும் வெற்றி பெற வேண்டும். லக்கி பாஸ்கர் படத்துக்கும் வாய்ப்பு கொடுங்கள்” என்று பேசியிருக்கிறார்.

சினிமா விகடனின் பிரத்யேக Whatsapp க்ரூப்

சினிமா தொடர்பான எக்ஸ்க்ளூசிவ் அப்டேட், அசத்தல் பேட்டிகள், டி.வி அப்டேட்கள் என எதையும் மிஸ் செய்யாமல் தெரிந்து கொள்ள...

உங்கள் வாட்ஸ் அப் மூலமே இணைந்திருங்கள் சினிமா விகடனுடன்...