South Africa vs India T20I: सेंच्युरियनमधील सुपरस्पोर्ट पार्क स्टेडियममध्ये बुधवारी (१३ नोव्हेंबर) भारत आणि दक्षिण आफ्रिका संघात टी२० मालिकेतील तिसरा सामना सुरु आहे. या सामन्यात भारताच्या तिलक वर्मा आणि अभिषेक शर्मा यांनी चौकार षटकारांची बरसात केली.

याबरोबरच या सामन्यात उडणाऱ्या किड्यांनीही हल्लाबोल केला होता, ज्यामुळे सामनाही काहीवेळ थांबवावा लागला. खरंतर क्रिकेटमध्ये बऱ्याचदा कमी-जास्त प्रकाशामुळे, पावसामुळे किंवा जोरदार वारा किंवा वादळामुळे सामना थांबवला जातो.

मात्र, किड्यांमुळे सामना थांबवण्याची घटना तशी दुर्मिळच. कधीकधी मधमाशांनी केलेल्या हल्ल्यामुळेही सामना थांबवावा लागला आहे. पण बुधवारी उडणाऱ्या किड्यांमुळे सामना थांबला.

झाले असे की भारताने या सामन्यात प्रथम फलंदाजी केली. भारताने २० षटकात ६ बाद २१९ धावा केल्या. त्यानंतर २२० धावांच्या लक्ष्याचा पाठलाग करण्यासाठी दक्षिण आफ्रिकेकडून रायन रिकल्टन आणि रिझा हेन्ड्रिक्स सलामीला फलंदाजीसाठी उतरले.

पण पहिलेच षटक सुरू असताना मैदानात उडणाऱ्या किड्यांनी हल्ला केल्या दिसले. संपूर्ण मैदानभर हे किडे उडत होते. त्यामुळे खेळाडूंना खेळताना व्यत्यय येत होता. अखेर पहिल्या षटकानंतर पंचांनी खेळ थांबवण्याचा निर्णय घेतला.