India vs South Africa 4th T20I: दक्षिण आफ्रिकेत मालिका विजयाच्या निर्धाराने चौथ्या ट्वेंटी-२० सामन्यात मैदानावर उतरलेल्या भारतीय फलंदाजांनी धावांचा एव्हरेस्ट उभा केला. संजू सॅमसन ( Sanju Samson) व तिलक वर्मा ( Tilak Varma) या जोडीने दुसऱ्या विकेटसाठी दोनशेपार भागीदारी करून आफ्रिकेच्या गोलंदाजांना रडवले.

दोघांनी शतक झळकावताना संघाला २० षटकात १ बाद २८३ इतकी मोठी धावसंख्या उभारून दिली. एका वर्षात आंतरराष्ट्रीय ट्वेंटी-२०त ३ शतक झळकावणारा संजू हा जगातील पहिला फलंदाज ठरला. तेच तिलकनेही सलग दुसरे शतक झळकावून आंतरराष्ट्रीय ट्वेंटी-२० सलग दोन शतके करणाऱ्या दुसऱ्या (पहिला संजू) भारतीय फलंदाजाचा मान मिळवला.

अभिषेक शर्माने १८ चेंडूंत २ चौकार व ४ षटकारांच्या मदतीने ३६ धावांची वादळी खेळी करून भारताला आक्रमक सुरुवात करून दिली. त्याने संजूसह पहिल्या विकेटसाठी ५.५ षटकांत ७३ धावा जोडल्या. त्यानंतर संजू सॅमसन व तिलक वर्मा ही वादळं घोंगावली.

एका वर्षात आंतरराष्ट्रीय क्रिकेटमध्ये तीन शतकं झळकावणारा संजू पहिलाच फलंदाज ठरला. शतकाच्या उंबरठ्यावर असताना तिलकचा सोपा झेल सुटला होता. त्यानंतर त्याने शतक पूर्ण केले, तत्पूर्वी संजूनेही आपली शतकी खेळी साकारली.

संजू ५६ चेंडूंत ६ चौकार व ९ षटकारांसह १०९ धावांवर नाबाद राहिला, तर तिलकनेही ४७ चेंडूंत ९ चौकार व १० षटकारांसह १२० धावांची नाबाद खेळी करून संघाला १ बाद २८३ धावांपर्यंत पोहोचवले.

भारतीय फलंदाजांनी या सामन्यात २३ षटकार खेचले, जे कसोटी खेळण्याचा मान असलेल्या देशांमधील ट्वेंटी-२० डावातील सर्वाधिक ठरले. संजू व तिलक यांनी ८६ चेंडूंत २१० धावांची भागीदारी केली.

त्यामुळे भारतासाठी ट्वेंटी-२० मध्ये २०० पेक्षा अधिक धावांची भागीदारी करणारी त्यांची पहिलीच जोडी ठरली. तसेच दुसऱ्या विकेटसाठी आंतरराष्ट्रीय ट्वेंटी-२० मध्ये सर्वोच्च भागीदारी करणारी जोडी ठरली.

• ४३६* धावा - संजू सॅमसन ( ११), २०२४

• ३६४ धावा - ऋषभ पंत ( २१), २०२२

• ३०५ धावा- केएल राहुल ( ८), २०२०

• २६८ धावा- महेंद्रसिंग धोनी ( १२ ) २०१२