Women’s Asian Champions Trophy 2024: महिला आशियाई अजिंक्यपद करंडक हॉकी स्पर्धेत आपली हुकुमत सिद्ध करताना भारताने बलाढ्य चीनचा ३-० असा पराभव केला. या विजयासह भारताने गटात अव्वल स्थान कायम ठेवले आहे.

शनिवारी झालेल्या या सामन्यात भारताकडून संगीता कुमारी (३२ वे मिनिट), सलिमा टेटे (३७) आणि दीपिका (६०) यांनी गोल केले. दीपिका या स्पर्धेत सर्वाधिक आठ गोल करून आघाडीवर आहे.

चीनविरुद्धच्या या सामन्यात भारताने सुरुवातीपासून आक्रमक खेळ केला. पहिल्या काही सेकंदातच भारताला पेनल्टी कॉर्नर मिळाला. दीपिकाने जोरदार फटका मारून गोल करण्याचा प्रयत्न केला; परंतु चीनची गोलरक्षक सुराँग वू हिने भक्कमपणे चेंडू अडवला.

भारताच्या या आक्रमक खेळाविरुद्ध चीनला मधूनच प्रतिआक्रमण करता येत होते; मात्र वर्चस्व मिळवणाऱ्या भारताकडून पहिल्या अर्धाला पाच मिनिटे शिल्लक असताना शर्मिलाने मध्य रेषेवरून चेंडू घेत सुनेलिताकडे पास दिला. तिने लगेचच दीपिकाकडे चेंडू दिला; पण गोल थोडक्यात हुकला.

पहिल्या अर्धात गोल शून्य बरोबरी होता. दुसऱ्या अर्धात चीनने आक्रमण केले. त्यांच्या चेंगचेंग लिऊ हिने मारलेला चेंडू भारताची गोलरक्षक बिछूच्या हातून निसटला; परंतु रिबाँड झालेला चेंडू मारण्यासाठी तेथे चीनची दुसरी खेळाडू नव्हती. आक्रमण-प्रतिआक्रमणाच्या खेळात दुसऱ्या अर्धातही गोल झाला नाही.