Malad West Vidhan Sabha Constituency Election मुंबई: मालाड पश्चिम विधानसभा मतदारसंघात महायुतीकडून विनोद शेलार (Vinod Shelar) यांना उमेदवारी देण्यात आली आहे. तर महाविकास आघाडीकडून अस्लम शेख (Aslam Shaikh) यांना पुन्हा तिकीट देण्यात आली आहे. विनोद शेलार पहिल्यांदाच विधानसभा निवडणूक लढवणार असून ते भाजपचे नेते आशिष शेलार यांचं बंधू आहेत.
2019 साली झालेल्या महाराष्ट्र विधानसभा निवडणुकीमध्ये मालाड पश्चिम विधानसभा मतदारसंघातून काँग्रेसकडून अस्लम शेख यांनी बाजी मारली होती. तर 2014 च्या विधानसभा निवडणुकीत देखील अस्लम शेख विजयी झाले होते. 2019 च्या निवडणुकीत अस्लम शेख यांनी भाजपाच्या रमेश सिंग ठाकूर यांचा 10 हजार मतांनी पराभव करत तिसऱ्यांदा विधानसभा गाठली होती. अस्लम शेख यांना 79,494 मते, तर रमेश सिंग ठाकूर यांना 69,092 मते मिळाली होती.
