World Children's Day 2024 : जागतिक बाल दिन का आणि कधी साजरा केला जातो ? इतिहास, महत्त्व आणि यंदाची थीम जाणून घ्या
World Children’s Day 2024: भारतात 14 नोव्हेंबरला बाल दिन साजरा केला जातो. भारताचे पहिले पंतप्रधान जवाहरलाल नेहरु यांच्या जयंतीच्या निमित्ताने 14 नोव्हेंबरला (Children's Day) देशात बाल दिन साजरा केला जातो. पण जागतिक स्तरावर बाल दिन दरवर्षी 20 नोव्हेंबरला साजरा केला जातो. (World Children’s Day 2024 History, Theme And Significance)
जागतिक बाल दिनाचा इतिहास (World Children's Day History )जागतिक बाल दिन साजरा करण्याची सुरुवात 1954 साली झाली. मिळालेल्या माहितीनुसार, 20 नोव्हेंबर 1954 ला पहिल्यांदा सार्वत्रिकरित्या बाल दिन साजरा करण्यात आला. त्याला सुरुवातीला युनिव्हर्सल चिल्ड्रन्स डे असं संबोधण्यात आलं. त्यानंतर 1959 मध्ये युनायटेड नेशन्स असेंब्लीने बाल हक्कांविषयी चर्चा करण्यासाठी अधिवेशनाचं आयोजन केलं होतं. संयुक्त राष्ट्राच्या अधिवेशनाचा वर्धापन दिन बाल दिन म्हणून साजरा करण्याचा निर्णय घेण्यात आला.
जागतिक बाल दिनाचे महत्त्व (Importance Of World Children's Day)जगभरातील मुलांचं कल्याण व्हावं यासाठी प्रोत्साहन देण्याचा प्रयत्न जागतिक बाल दिनाच्या निमित्ताने केला जातो. मुलांच्या हक्कांविषयी जागरुकता पसरवणे आणि त्यांच्या विकासासाठी आवश्यक प्रयत्न करणे हा जागतिक बाल दिन साजरा करण्यामागचा उद्देश आहे. अनेक आंतरराष्ट्रीय संघटना मुलांना त्यांचे हक्क मिळवून देण्यासाठी काम करत आहे. युनिसेफदेखील लहान मुलांचा विकास होण्यासाठी अविरतपणे कार्यरत आहे.
जागतिक बाल दिन 2024 ची थीम (World Children's Day 2024 Theme ) दरवर्षी युनिसेफकडून जागतिक बाल दिनाची एक थीम ठरवण्यात येते. जागतिक बाल दिन 2024 ची थीम ' प्रत्येक मुलासाठी सगळे अधिकार' (For Every Child , Every Right) अशी आहे. मुलांचे सगळे अधिकार त्यांना मिळावेत, या उद्देशाने प्रयत्न व्हावेत, हा या थीमचा हेतू आहे. मुलांना शिक्षण, आहार, निवारा या सोयी मिळणे आवश्यक आहे. बालमजुरीपासून मुलांना थांबवणं आवश्यक आहे.
मुलंच आपलं भविष्य आहेत. मुलांना चांगलं आयुष्य जगता यावं, यासाठी प्रयत्न करणं, ही आपल्या सगळ्यांची जबाबदारी आहे. मुलांना सुखी जीवन जगता यावं म्हणून त्यांना त्यांचे अधिकार मिळवून देणं आवस्यक आहे. मुलंच जर त्यांच्या अधिकारांपासून वंचित राहिली तर भविष्यात अनेक समस्या निर्माण होतील. मुलांच्या विकासासाठी पोषक वातावरण निर्माण केल्याने ते सक्षम बनू शकतात. जागतिक बाल दिनाच्या निमित्ताने या सगळ्या गोष्टींचा विचार होणं आवश्यक आहे.
