नाशिक : महाराष्ट्र विधानसभेच्या (Maharashtra Vidhan Sabha Election 2024) 288 जागांसाठी आज मतदान पार पडत आहे. आज सकाळी सात वाजेपासून मतदानाला सुरुवात झाली असून नांदगाव विधानसभा मतदारसंघात (Nandgaon Assembly Constituency Election) मोठा राडा झाल्याची माहिती मिळत आहे. अपक्ष उमेदवार समीर भुजबळ (Sameer Bhujbal) आणि शिवसेना शिंदे गटाचे उमेदवार सुहास कांदे (Suhas Kande) यांच्या गटात जोरदार बाचाबाची झाली. 

विधानसभा निवडणुकीचा कार्यक्रम जाहीर होताच नांदगाव विधानसभा मतदारसंघाची राज्यभरात चर्चा झाली. कारण राष्ट्रवादी अजित पवार गटाचे ज्येष्ठ नेते छगन भुजबळ यांचे पुतणे समीर भुजबळ यांनी या मतदारसंघात अपक्ष उमेदवारी अर्ज दाखल केला आहे. त्यांच्या समोर शिवसेना शिंदे गटाचे सुहास कांदे, ठाकरे गटाचे गणेश धात्रक आणि अपक्ष डॉ. रोहन बोरसे यांचे प्रमुख आव्हान आहे. तर नामसाधर्म्य असलेले अपक्ष उमेदवार गणेश धात्रक व सुहास कांदे यांच्यासह अकबर सोनावाला, गौतम गायकवाड, आनंद शिगारे, फिरोज करींम, वाल्मीक निकम, वैशाली व्हडगर, सुनील सोनवणे, हारुण पठाण आदी चौदा उमेदवार निवडणूक रिंगणात उतरले आहेत. त्यामुळे नांदगाव विधानसभा मतदारसंघाकडे सर्वांचेच लक्ष लागले आहे.

नांदगावमध्ये जोरदार राडा

आज सकाळी सात वाजेपासून मतदानाला सुरुवात झाली आहे. मतदानाला सुरुवात होऊन दोन तास उलटत नाही तोच नांदगावमध्ये जोरदार राडा झाला. सुहास कांदे यांनी बोलाविलेल्या मतदारांना समीर भुजबळांनी अडवले.  यानंतर समीर भुजबळ आणि सुहास कांदे समोरासमोर आल्याचे पाहायला मिळाले. नांदगाव-मनमाड रस्त्यावर हा प्रकार घडला. गुरुकुल कॉलेज परिसरातून मतदार मतदानाला निघाले होते. यावेळी समीर भुजबळ आणि सुहास कांदे यांच्या गटात जोरदार राडा झाल्याचे दिसून आले. समीर भुजबळांनी गाड्या आडव्या लावत मतदारांना अडवले. यामुळे नांदगावमध्ये वातावरण तापले आहे. आता पोलीस घटनास्थळी दाखल झाले असून पोलीस दोन्ही गटांना शांत राहण्याचे आवाहन करत आहेत. 

अडवून ठेवलेले मतदार संतापले

आता समीर भुजबळांनी अडवून ठेवलेले मतदार संतापले आहेत. आमचा वेळ वाया घालवू नका. आम्हाला मतदानापासून वंचित ठेवू नका. पोलिसांनो, आमचे आधारकार्ड तपासा. आम्ही बिहारी नाही तर मतदार संघातले आहोत. केवळ जेवणासाठी थांबलेलो होतो. संयम बाळगला, आमच्या सहनशीलतेचा अंत पाहू नका, असे म्हणत आता मतदारांनी संताप व्यक्त केलाय. 

नांदगावमध्ये EVM मशीन पडले बंद

दरम्यान, नांदगाव मतदारसंघातील 164 मतदान केंद्रावरील ईव्हीएम मशीन तब्बल दोनदा बंद पडले आहे. न्यू. इंग्लिश स्कूल येथील मतदान केंद्रावरील हा प्रकार घडला आहे. मतदार तब्बल दोन तासांपासून मतदानासाठी ताटकळत उभे राहिल्याचे दिसून येत आहे. मतदारांच्या बोटाला शाई लावली असून मात्र ईव्हीएम मशीन बंद असल्याने मतदारांना आपला हक्क बजावता आलेला नाही. यामुळे निवडणूक आयोगाचा गलथान कारभार समोर आला आहे. 

आणखी वाचा 

Maharashtra Assembly Election 2024 : भुजबळ, झिरवाळ, भुसेंसह बड्या नेत्यांची प्रतिष्ठा पणाला, नाशिकमध्ये मतदार जुन्या चेहऱ्यांना निवडणार की परिवर्तन होणार?