गुरुवायूर कृष्ण मंदिर – हे केरळमध्ये स्थित भगवान कृष्णाचे मंदिर आहे. या मंदिरात ड्रेस कोड लागू करण्यात आला आहे. या मंदिरात पुरुषांना पारंपरिक धोती घालूनच देवाचे दर्शन घेता येते. तर महिलांना केवळ साडी किंवा सूट घालूनच देवाचे दर्शन घेण्याची परवानगी आहे.

महाबळेश्वर मंदिर – हे भगवान शंकराचे प्रसिद्ध मंदिर आहे. हे मंदिर कर्नाटकात आहे. जीन्स, पॅन्ट, पायजमा, टोपी, हॅट, कोट, बर्मुडा घालून आल्यास भाविकांना या मंदिरात देवाचे दर्शन घेता येत नाही. मंदिरात हे सर्व कपडे घालून प्रवेश करण्यावर बंदी आहे. मंदिरात भगवान शंकराचे दर्शन घेण्यासाठी पुरुषांना धोतर परिधान करावे लागते, तर महिलांना येथे साडी किंवा सूट घालूनच देवाचे दर्शन घेता येते.

घृष्णेश्वर महादेव मंदिर – हे मंदिर भगवान शंकराच्या 12 ज्योतिर्लिंगांपैकी एक मानले जाते. हे मंदिर महाराष्ट्रातील संभाजी नगर येथील दौलताबाद भागात आहे. येथेही तुम्हाला दर्शन घ्यायचे असेल तर ड्रेस कोड पाळावा लागेल. महिला पारंपरिक पेहरावात येथे भेट देतात. तर पुरुषांना देवाचे दर्शन घेण्यासाठी वरचे कपडे काढावे लागतात. याशिवाय मंदिरात बेल्ट, पर्स यांसारख्या वस्तू नेण्यासही बंदी आहे.

महाकाल मंदिर – महाकाल किंवा महाकालेश्वर मंदिर खूप प्रसिद्ध आहे. भगवान शंकराचे हे मंदिर त्यांच्या 12 ज्योतिर्लिंगांपैकी एक आहे. हे मंदिर मध्य प्रदेशातील उज्जैन येथे आहे. महाकालच्या दर्शनासाठी या मंदिरात दररोज भाविकांची मोठी गर्दी होते. या मंदिरातही ड्रेस कोड लागू आहे. मंदिरात जलाभिषेकासाठी पुरुषांना धोतर-कुर्ता तर महिलांना साडी नेसावी लागते.

तिरुपती बालाजी – आंध्र प्रदेशात असलेले हे मंदिर अतिशय सुंदर आहे. या मंदिरातही देवाचे दर्शन घेण्यासाठी ड्रेस कोड पाळावा लागतो. हाफ पँट किंवा टी-शर्ट घालून येथे येणाऱ्या लोकांना दर्शन घेण्याची परवानगी नाही. तर महिलांना साडी किंवा सूट घालूनच मंदिरात दर्शन मिळते.