உக்ரைனை நேட்டோவில் இணைவதை தடுக்கும் வகையில், அதன் அண்டை நாடான ரஷ்யா, பிப்ரவரி 24, 2022 முதல் அந்நாட்டின் மீது போர் தொடுத்து வருகிறது. அமெரிக்கா மற்றும் ஐரோப்பிய நாடுகள் உக்ரைனுக்கு நிதி மற்றும் ராணுவ உதவி அளித்து வரும் நிலையில், உக்ரைனும் ரஷ்யாவுக்கு பதிலடி கொடுத்து வருகிறது. . இதற்கிடையில், அமெரிக்கா, உக்ரைன் மற்றும் தென் கொரியா ஆகியவை அதன் நட்பு நாடான வடகொரியா ரஷ்யாவிற்கு ஏவுகணைகள், அணு ஆயுதங்கள் மற்றும் இராணுவ வீரர்களை வழங்கியதை உறுதிப்படுத்தியுள்ளன.

இதனால், இரண்டு ஆண்டுகளுக்கும் மேலாக இரு நாடுகளுக்கும் இடையே போர் நீடித்து வருகிறது. சமீபத்தில் கூட இந்த போரில் ரஷ்யாவின் அணுசக்தி படைகளின் தளபதி கொல்லப்பட்டார் என்பது குறிப்பிடத்தக்கது.இந்நிலையில் உக்ரைன் புதிய லேசர் ஆயுதத்தை உருவாக்கி உள்ளதாக அதன் விமானப்படை தலைமை அதிகாரி வாடிம் சுகோரெவ்ஸ்கி தெரிவித்துள்ளார். ட்ரைஸப் என்று பெயரிடப்பட்டுள்ள இந்த ஆயுதம், 2 கிலோமீட்டர் (1.2 மைல்) உயரத்தில் உள்ள விமானங்களை துல்லியமாக தாக்கும் திறன் கொண்டது என கூறப்படுகிறது. உக்ரைனின் தேசிய சின்னமான மூன்று முனைகள் கொண்ட வாள்  என்பதன் பெயரால் ட்ரைசுப் பெயரிடப்பட்டது.

இது சுதந்திரம், சக்தி மற்றும் ஒற்றுமையை குறிக்கிறது. மெதுவாக பறக்கும், குறைந்த உயரம் கொண்ட ட்ரோன்களை வெற்றிகரமாக எதிர்கொள்வதில் இது பயனுள்ளதாக கருதப்படுகிறது. இது 2014 ஆம் ஆண்டு அறிமுகப்படுத்தப்பட்ட அமெரிக்காவின் லேசர் ஆயுத அமைப்பு LaWS ஐ அடிப்படையாகக் கொண்டதாகக் கூறப்படுகிறது. சில நாடுகளில் மட்டுமே இத்தகைய லேசர் ஆயுதங்கள் உள்ளன. வணிக ரீதியான வெல்டிங் லேசர்கள் மற்றும் தொழில்நுட்பங்களின் உதவியுடன் இது நடைமுறையில் சாத்தியமாகும் என்று ஆயுத ஆராய்ச்சி நிபுணர் பேட்ரிக் சென்ஃப்ட் கூறினார்.

உக்ரைனின் ட்ரைஸப் அதன் சோதனைகளில் வெற்றி பெற்றால், அது ரஷ்ய ட்ரோன்களை எதிர்ப்பதற்கான முக்கிய கருவியாக மாறும் என்று நிபுணர்கள் நம்புகின்றனர். அதே நேரத்தில், உக்ரைன் இதை எவ்வாறு உருவாக்கியது என்பது தெரியவில்லை, ஆனால் சில பாதுகாப்பு வல்லுநர்கள் இது இங்கிலாந்தின் டிராகன்ஃபயர் வடிவமைப்பால் ஈர்க்கப்பட்டிருக்கலாம் என்று நம்புகின்றனர்.

இந்நிலையில், லேசர் ஆயுதங்களை வைத்திருக்கும் நாடுகளின் பட்டியலில் இப்போது உக்ரைனும் இணைந்துள்ளது. இந்தப் பட்டியலில் உள்ள மற்ற நாடுகளில் அமெரிக்கா, இஸ்ரேல், துருக்கி, ஜெர்மனி, ஜப்பான் மற்றும் சீனா ஆகியவை அடங்கும். சமீபத்தில், தைவானிடமும் லேசர் ஆயுதங்கள் இருப்பதாகக் கூறப்பட்டது. வடகொரியாவின் ஆளில்லா விமானங்களை இடைமறித்து அழிக்கக்கூடிய லேசர் ஆயுதங்கள் தங்களிடம் இருப்பதாக கடந்த ஜூலை மாதம் தென்கொரியாவும் அறிவித்தது. இந்தியாவும் லேசர் ஆயுதங்களை சோதனை செய்து வருகிறது. அதேபோன்று உக்ரைனின் எதிரி நாடான ரஷ்யாவும் உயர் ஆற்றல் கொண்ட லேசரை உருவாக்கி வருவதாக கூறப்படுகிறது.