அமெரிக்க நாடாளுமன்றத்தில் உள்ள செலவினங்கள் மீதான மசோதா, பிரதிநிதிகள் சபையில் நிறைவேற்றப்பட்டாலும், அதை நிறைவேற்ற முடியவில்லை. அந்நாட்டு நாடாளுமன்றத்தில் அவசர திட்டத்தை உடனடியாக கொண்டு வரவில்லை என்றால் நாளை முதல் அமெரிக்க அரசு முடக்கப்படும்.மசோதாவை வெற்றிகரமாக நிறைவேற்ற இன்று இரவு வரை மட்டுமே அவகாசம் உள்ளது. இல்லையெனில், அங்குள்ள ஃபெடரல் ஏஜென்சிகள் மூடப்படும். இதன் பொருள் ஆயிரக்கணக்கான அமெரிக்க கூட்டாட்சி ஊழியர்கள் கட்டாய விடுப்பில் அனுப்பப்படுவார்கள். அல்லது ஊதியம் இன்றி வேலை செய்யும் நிலைக்கு தள்ளப்படுவார்கள். இதைப் பற்றிய 10 முக்கியமான விஷயங்களைப் பார்ப்போம்.

அமெரிக்க கூட்டாட்சி அரசாங்கத்திற்கு தற்காலிக அல்லது நிரந்தர நிதியுதவி வழங்கும் சட்டத்தை காங்கிரஸ் நாடாளுமன்றத்தில் தவறினால், அரசாங்கம் மூடப்படும். இது தானாக நடக்கும். ஜனாதிபதியின் ஒப்புதல் தேவையில்லை.. அமெரிக்க நேரப்படி வெள்ளிக்கிழமை இரவுக்குள் செலவு மசோதா நிறைவேற்றப்பட வேண்டும். இல்லையெனில், மத்திய அரசு முடக்கப்படும். கடந்த செப்டம்பர் மாதம் அமெரிக்கா மூடப்படும் நிலைக்கு தள்ளப்பட்டது. அப்போது தற்காலிக தீர்வாக மசோதா நிறைவேற்றப்பட்டது. அந்த மசோதா நாளையுடன் காலாவதியாகும் நிலையில், அமெரிக்க அரசு மூடப்படும் அபாயம் ஏற்பட்டுள்ளது.

அமெரிக்கா எப்படி பாதிக்கப்படும்: இதன் காரணமாக சுமார் 8.75 லட்சம் அமெரிக்கர்கள் தற்காலிக பணிநீக்கத்தை சந்திக்க நேரிடும். மேலும், சுமார் 1.4 லட்சம் அத்தியாவசியத் துறை ஊழியர்கள் ஊதியமின்றி பணிபுரியும் நிலைக்குத் தள்ளப்படுவார்கள். அதாவது, அமெரிக்க உளவுத் துறை, எல்லைக் காவல், கடலோர காவல்படை போன்ற அத்தியாவசிய அமைப்புகள் தொடர்ந்து செயல்படும். அதேபோன்று அமெரிக்க தபால் சேவையும் தன்னந்தனியாகச் செயல்படுவதால் பாதிக்கப்படாது. அதே நேரத்தில், அமெரிக்க பொருளாதாரத்தில் குறிப்பிடத்தக்க பங்களிப்பை வழங்கும் சுற்றுலாத் துறை பெரும் இழப்பை சந்திக்கும். ஏனெனில் தேசிய பூங்காக்கள் மற்றும் நினைவுச்சின்னங்கள் மூடப்படும். இது நீதி அமைப்பையும் கடுமையாக பாதிக்கும். குற்ற வழக்குகளின் விசாரணை தொடரும் என்றாலும், சிவில் வழக்கு விசாரணைகள் தற்காலிகமாக நிறுத்தி வைக்கப்படும்.

ஊதியம் இல்லாமல் பணிபுரிய வேண்டும்: விமான பாதுகாப்பை உறுதி செய்யும் மத்திய விமான போக்குவரத்து நிர்வாகம், அங்கு அத்தியாவசிய பணியாக கருதப்படுவதால், அந்த அதிகாரிகள் தொடர்ந்து பணியாற்றுவர். ஆனால், சம்பளம் இன்றி வேலை செய்ய வேண்டியுள்ளதால் பலர் விடுப்பு எடுக்கும் நிலை உள்ளது. இதனால் விமான சேவையில் அதிக தாமதங்கள் மற்றும் விமானங்கள் ரத்து செய்யப்படும். இதனால் மத்திய அரசு வழங்கும் பல முக்கிய சேவைகள் தற்காலிகமாக நிறுத்தப்படலாம். இது அரசுத் திட்டங்களை நம்பியுள்ள ஏழை மற்றும் நடுத்தர வருமான மக்களை கடுமையாகப் பாதிக்கும். அமெரிக்காவில் அடுத்து என்ன நடக்கும்: தீர்வு காண முடியாவிட்டால்,  அடுத்த இரண்டு நாட்கள் வார விடுமுறை என்பதால், உண்மையான பாதிப்பு ஏற்படாது. அமெரிக்க காங்கிரசுக்கு இன்று இரவு வரை அவகாசம் உள்ளது. அதற்குள் ஒரு தற்காலிக தீர்வு நிறைவேற்றப்பட்டால், அமெரிக்கா மூடப்படும் அச்சுறுத்தலில் இருந்து காப்பாற்றப்படும்.