ICC Men's Test Bowling Rankings: ऑस्ट्रेलिया विरुद्ध भारत संघात काही दिवसांपूर्वीच ब्रिस्बेनमधील गॅबावर कसोटी मालिकेचा तिसरा सामना झाला होता. आता २६ डिसेंबरपासून मेलबर्नला चौथा कसोटी सामना सुरू होणार आहे. या सामन्याआधी आयसीसीने बुधवारी (२५ डिसेंबर) ताजी कसोटी क्रमवारी जाहीर केली आहे. या क्रमवारीत भारताचा वेगवान गोलंदाज जसप्रीत बुमहारने नवा विक्रम केला आहे.

कसोटी क्रमवारीत गोलंदाजांच्या यादीत बुमराह अव्वल क्रमांकावर कायम आहे. पण ब्रिस्बेन कसोटीत त्याने घेतलेल्या ९ विकेट्समुळे आता त्याच्या रेटिंग पाँइंट्समध्ये १४ पाँइंट्सची वाढ झाली आहे. त्याचे ९०४ रेटिंग पाँइंट्स झाले आहेत.

त्यामुळे बुमराह कसोटी क्रमवारीत गोलंदाजांच्या यादीत ९०० हून अधिक रेटिंग पाँइंट्स मिळणारा आर अश्विननंतरचा दुसराच भारतीय आहे, तसेच पहिलाच भारतीय वेगवान गोलंदाज ठरला आहे.

अश्विननेही डिसेंबर २०१६ मध्ये वानखेडे कसोटीनंतर ९०४ रेटिंग पाँइंट्सपर्यंत मजल मारली होती. त्यामुळे आता अश्विनच्या ९०४ रेटिंग पाँइंट्सच्या विक्रमाला मागे टाकून सर्वाधिक रेटिंग पाँइंट्स मिळवणारा भारतीय गोलंदाज होण्याची बुमराहला संधी आहे.

सध्या गोलंदाजांच्या क्रमवारीत बुमराहपाठोपाठ दुसऱ्या क्रमांकावर दक्षिण आफ्रिकेचा कागिसो रबाडा (८५६ रेटिंग पाँइंट्स) आहे, तर तिसऱ्या क्रमांकावर ऑस्ट्रेलियाचा जोश हेजलवूड (८५२ रेटिंग पाँइंट्स) आहे.

पॅट कमिन्स (८२२ रेटिंग पाँइंट्स) चौथ्या आणि भारताचा आर अश्विन (७८९) पाचव्या क्रमांकावर आहे. भारताचा फिरकीपटू रविंद्र जडेजाची मात्र क्रमवारी घसरली आहे. तो ४ क्रमांकाने घसरून १० व्या क्रमांकावर आला आहे.